Saturday, September 20, 2014

'ఆగడు' కాదు - 'దూకుడు సింగ్'

టీజర్ విడుదలదగ్గరనుంచి గబ్బర్ సింగ్ తో పోల్చబడుతున్న 'ఆగడు' చిత్రం, నిన్న విడుదలతర్వాతచూస్తే ఆ వాదనను నిజంచేసేటట్లుగా ఉంది. చిత్ర రచయితలు, దర్శకుడు శ్రీనువైట్లపై గబ్బర్ సింగ్ ప్రభావం స్పష్టంగా...ముఖ్యంగా మూలకథలో, ఫస్ట్ హాఫ్  లో, సన్నివేశాలలో కొట్టొచ్చినట్లు కనబడుతుంది. మరోవైపు శ్రీనువైట్ల-మహేష్ కాంబినేషన్లో వచ్చిన దూకుడు ప్రభావం మరోవైపు. వెరసి ఇది దూకుడుసింగ్ అయింది. ఈ పరమ రొటీన్, ఫార్ములా కథకు కథనంలో కొత్తదనం ఏమీ లేకపోవటం పెద్ద మైనస్.

ఎప్పుడూ ఎవరో ఒకరితో గొడవపెట్టుకునే దర్శకుడు శ్రీనువైట్ల ఈ సారి కోనవెంకట్, గోపిమోహన్ లతో గొడవపెట్టుకుని 'ఆగడు'కు అనిల్ రావిపూడి, ఉపేంద్ర మాధవ్, ప్రవీణ్ వర్మ అనే కొత్త రచయితలను పెట్టుకున్నారు. వీరి డైలాగులు బాగానే ఉన్నప్పటికీ అవి సంక్లిష్టంగా, హైరేంజ్ లో ఉండటం ప్రధానంగా మైనస్ పాయింట్. మహేష్ విలన్స్ ను ట్రాప్ చేయటానికి తన పాత హిట్ సినిమాల కథలను చెప్పే కాన్సెప్ట్ సులభంగా అర్ధంకావటంలేదు. మీలో ఎవరు పోటుగాడు ఎపిసోడ్ లోని కాన్సెప్ట్ కూడా అలాగే ఉంది. డైలాగులు, అరుపులు, పంచ్ లు సినిమాలో బాగా ఎక్కువైపోయాయి. మహేష్ డైలాగులు కొన్నిచోట్ల అర్ధంకానంతస్పీడుగా ఉన్నాయంటే ఈ డైలాగులు ఎంత ఎక్కువగా ఉన్నాయో అర్ధం చేసుకోవచ్చు.

ఇక శ్రీనువైట్ల దర్శకత్వంలో మెరుపులు ఎక్కడా కనబడలేదు. సినిమా అంతా సాదా, సీదాగా సాగిపోతూ ఉంటుంది. కొన్నిచోట్ల బోరుగాకూడా అనిపిస్తుంది. తమన్ స్వరాలు నానాటికి తీసికట్టుగా తయారవుతుండటం తెలిసిందే. పాటల చిత్రీకరణలో నూతనత్వం, విజువల్ ట్రీట్ ఏమీ అనిపించలేదు. ఫోటోగ్రఫీచూస్తే - పోలీస్ స్టేషన్ సన్నివేశాలలో ఒక ప్రత్యేకమైన టింట్ కనిపించేటట్లు చేశారు. అది ఏమీ ఆహ్లాదకరంగా అనిపించకపోగా, లోపంలాగా కనిపించింది. శృతిహాసన్ పాటలోకూడా ఈ టింట్ కనబడటంతో అది పెద్దగా ఆకట్టుకోలేకపోయింది. పాటల లొకేషన్స్ బాగున్నాయి. సినిమామొత్తం భారీతనం అణువణువునా కొట్టొచ్చినట్లు కనబడింది. ఫస్ట్ హాఫ్ గబ్బర్ సింగ్, సెకండ్ హాఫ్ దూకుడు ప్రభావం బాగా కనిపించింది. సెకండ్ హాఫ్ లో విలన్స్ ను కొట్టే సన్నివేశాలలో నాయక్ చిత్రం గుర్తుకువస్తుంది. ఫస్ట్ హాఫ్ తో పోలిస్తే సెకండ్ హాఫ్ వీక్ గా ఉంది. లెంగ్త్ ఎక్కువగా ఉండటం సినిమాకు మరో మైనస్ పాయింట్.

మరోవైపు గతవారం పోలీస్ కథలతోనే అనుక్షణం, పవర్ చిత్రాలు రిలీజైన సంగతి తెలిసిందే. 'అనుక్షణం' విమర్శకుల ప్రశంశలు అందుకుంది. 'పవర్'లో రవితేజ పర్ఫార్మెన్స్ ఎలక్ట్రిఫయింగ్ గా, ఎనర్జిటిక్ గా ఉంది. ఇలాంటి సమయంలోనే రిలీజైన ఆగడులో మహేష్ పోలీస్ పాత్రను ఆ పాత్రలతో పోల్చటం అనివార్యం. వాటితో పోలిస్తే ఆగడులో మహేష్ పోషించిన ఎన్ కౌంటర్ శంకర్ పాత్ర గొప్పగా అనిపించదు. ప్రకాష్ రాజ్ శ్రీనువైట్లతో గొడవగురించి ప్రెస్ మీట్ లో చెప్పిన నామీద రాళ్ళు విసరకు, ఇల్లు కట్టుకుంటాను అనే కవితను ఈ చిత్రంలో విలన్ సోనూ సూద్ తో చెప్పించారు.

టాక్ వీక్ అయినప్పటికీ మేగ్జిమమ్ ధియేటర్లలో రిలీజ్ చేశారుకాబట్టి మొదటి వారంలో ఓపెనింగ్స్ ద్వారా నిర్మాతలు బాగానే రాబట్టుకోగలుగుతారు. ఏది ఏమైనా మహేష్ కథల ఎంపికలో మరింత జాగ్రత్తగా ఉండాల్సిన అవసరం ఉంది.

Friday, September 12, 2014

దర్శకేంద్రుడు రాఘవేంద్రరావుకు తృటిలో తప్పిన చెప్పుదెబ్బ!


శతాధిక చిత్రాల దర్శకుడు, అన్నమయ్య, రామదాసువంటి 'కళాఖండాల' సృష్టికర్త కె.రాఘవేంద్రరావు గతంలో ఒకసారి ప్రముఖ నిర్మాత కె.మురారి చెప్పుదెబ్బనుంచి తృటిలో తప్పించుకున్నారట. ఈ వైనాన్ని మురారి ఇవాళ చెన్నైలో స్వయంగా వివరించారు. 

చెన్నైలో నివశించే మురారి ఇవాళ ఒక పుస్తకా‌విష్కరణ కార్యక్రమం సందర్భంగా విలేకరులతో ఇష్టాగోష్ఠిగా మాట్లాడుతూ రాఘవేంద్రరావుకు గీతం యూనివర్సిటీ యాజమాన్యం డాక్టరేట్ ప్రదానం చేయనున్నట్లు ప్రకటించడంపై స్పందించారు. సంస్కారహీనుడైన రాఘవేంద్రరావుకు డాక్టరేట్ ఇవ్వటంలో ఔచిత్యమేమిటని ప్రశ్నించారు. గీతం యూనివర్సిటీ డాక్టరేట్‌లు ప్రకటింటిన ముగ్గురిలో మిగిలిన ఇద్దరి విషయంలో ఎవరూ వేలెత్తి చూపాల్సిన అవసరంలేదని, అయితే రాఘవేంద్రరావుకు ఇవ్వటం సరైన నిర్ణయం కాదని మురారి అన్నారు. గీతం విద్యాసంస్థల వ్యవస్థాపకుడు మూర్తి అంటే తనకెంతో గౌరవం ఉందని చెప్పారు. 

ఇక రాఘవేంద్రరావు గురించి చెప్పుకొస్తూ, అతనికి సంస్కారం లేదని, పెద్దలంటే గౌరవంలేదని మురారి అన్నారు. ఒకసారి అతను తమ ఇంటికి వచ్చినపుడు తమ ఇంటి హాల్‌లో తన తల్లిదండ్రుల ఫోటోను చూశాడని, ఆ ఫోటోలోని తన తల్లిని ఉద్దేశించి ఏమిటి నల్లగా, అంత అసహ్యంగా ఉందని రాఘవేంద్రరావు అన్నాడని మురారి చెప్పారు. ఆ మాటలతో తాను ఒక్కసారిగా దిగ్భ్రాంతికి గురయ్యానని తెలిపారు. తాను తేరుకుని స్పందించేలోపు, రాఘవేంద్రరావు తన భావాలను గమనించి వెంటనే వడివడిగా బయటకెళ్ళిపోయి కారులో ఉడాయించాడని మురారి చెప్పారు. తాను చెప్పుతీసేలోపుగానే ఇదంతా జరిగిపోయిందని తెలిపారు. రాఘవేంద్రరావు తనకు డబ్బలుకూడా ఎగ్గొట్టాడని చెప్పారు. అసిస్టెంట్ డైరెక్టర్‌‌లగురించి హేళనగా, చౌకబారుగా వ్యాఖ్యానిస్తాడని అన్నారు. అలాంటి సంస్కారహీనుడికి డాక్టరేట్ ఇవ్వటం ఏవిధంగా సముచితమని ప్రశ్నించారు. మురారి వ్యాఖ్యలపై10టీవీలో వార్తను ఈ లింక్‌లో చూడొచ్చు. మురారి యథాతథంగా చెప్పినమాటలను ఈ లింక్ లో చూడొచ్చు.

సీతామాలక్ష్మి, గోరింటాకు వంటి చిత్రాల నిర్మాతగా ప్రసిద్ధిగాంచిన మురారి రాఘవేంద్రరావు దర్శకత్వంలో త్రిశూలం, జానకిరాముడు అనే చిత్రాలను నిర్మించారు. రాఘవేంద్రరావు ఒకటో, రెండో తప్పితే పెద్దగా వివాదాలలో ఉండే మనిషికాదు. పదేళ్ళక్రితం ఒక అమ్మాయి వివాదంలో నటుడు రాజశేఖర్ దర్శకేంద్రుడిని ఇంటికెళ్ళిమరీ బట్టలు చిరిగిపోయేవరకు కొట్టటం, అంతకుముందు నర్తకి సిల్క్ స్మితకు ఆయనకు మధ్య గొడవవంటి అతికొద్దివివాదాలుమాత్రమే ఆయన కెరీర్‌లో ఉన్నాయి. బంజారాహిల్స్ రోడ్ నంబర్‌2లోని ఆయన మల్టీప్లెక్స్ నిర్మించిన స్థలంవివాదం రాజకీయపరమైనది. వివాదరహితుడిగా తెలుగు ఫిల్మ్ ఇండస్ట్రీలోని తన అభిమానులచే, తనవర్గంవారిచే కీర్తించబడే రాఘవేంద్రరావును మొత్తానికి మురారి బజారుకీడ్చారు. అదీ గౌరవ డాక్టరేట్ తీసుకునేముందు. ప్చ్!

                                                          ***

Thursday, September 11, 2014

'నమస్తే తెలంగాణ-2'గా మారుతున్న 'ఈనాడు'






వ్యాపారవేత్తలు పత్రికాధిపతులైతే చాలా ప్రమాదమని పత్రికారంగ పెద్దలు ఏనాడో చెప్పారు. వ్యాపారవేత్తలు తమ వ్యాపార ప్రయోజనాలకోసం పత్రికా ప్రమాణాలను పణంగా పెడుతున్న ప్రస్తుత తరుణాన్ని ఆ పెద్దలు ఆనాడే ఊహించి ఉంటారు.

హైదరాబాద్‌లో, తెలంగాణలోని మిగిలిన ప్రాంతాలలో పలు వ్యాపారాలను, ఆస్తులను కలిగిఉన్న రామోజీరావు, ఆయన పుత్రరత్నం కిరణ్ - ముఖ్యమంత్రి కేసీఆర్‌పట్ల విధేయత ప్రకటించుకోవడానికి(to be in good books of KCR) నానా తంటాలు పడుతున్నారు. కేసీఆర్‌పై విమర్శలుగానీ, ప్రభుత్వ వ్యతిరేక వార్తలుగానీ తమ పత్రికలో ప్రముఖంగా కనపడకుండా జాగ్రత్తలు తీసుకుంటున్నారు. రామోజీరావు వ్యాపారాలను కేసీఆర్ ఏమి చేస్తాడనుకుంటున్నారా? తెలంగాణ ప్రభుత్వంవస్తే రామోజీ ఫిలింసిటీని నాగళ్ళతో దున్నిస్తానని గతంలో అన్న కేసీఆర్ ఇప్పుడు అంతపని చేయకపోవచ్చుగానీ, తెలంగాణలో కొత్త ఫిలిమ్ సిటీ(కేసీఆర్ ఇటీవల ఈమేరకు ప్రకటన చేసిన విషయం తెలిసిందే) పెడితేమాత్రం అంతపని చేసినట్లే అవుతుంది.

కేసీఆర్ చేసే ప్రతిపనినీ విమర్శించాలనీ, ఆయన ప్రతిమాటనూ ఖండించాలని వివేకము, విచక్షణ ఉన్నవారు ఎవరూ అనరు. అయితే వార్తను వార్తగా నివేదించటం, రాగద్వేషాలకతీతంగా, నిష్పక్షపాతంగా విశ్లేషణ చేయటం అనేది ప్రజాస్వామ్యానికి నాలుగో స్తంభమైన పత్రికావ్యవస్థ ప్రాధమిక కర్తవ్యం. 

మొన్న వరంగల్‌లో కాళోజీ జయంతి సందర్భంగా జరిగిన కార్యక్రమంలో ముఖ్యమంత్రి కేసీఆర్ ఉపముఖ్యమంత్రి రాజయ్యనుద్దేశించి చేసిన వ్యాఖ్యలు వివాదాస్పదంగా మారాయి. వరంగల్‌లో హెల్త్ యూనివర్సిటీ స్థాపిస్తామని రాజయ్య అంతకుముందు చెప్పడాన్ని ఎద్దేవా చేస్తూ, "రాజయ్య హెల్త్ యూనివర్సిటీ పెట్టగలుగుతాడా? ఎందుకు డంబాచారాలు, అడ్డమైన వొర్లుడు" అని కేసీఆర్ అన్నారు. ఆయన యథాతథంగా ఏమన్నదీ క్రింది వీడియోలో చూడొచ్చు.

ప్రభుత్వంలో తన తర్వాత తన అంతటివాడైన ఉపముఖ్యమంత్రి రాజయ్య చేసిన ప్రకటనను అక్కడికక్కడే సభాముఖంగా ఖండించటం, ఎద్దేవాగా మాట్లాడటం విమర్శలకు దారితీసింది. దానికితోడు ఉపముఖ్యమంత్రులలో ఒకరిని తొలగించనున్నారని ప్రభుత్వంనుంచి ముఖ్యవర్గాలు పత్రికలకు ఇటీవల సమాచారాన్ని లీక్ చేసిఉండటంతో అది రాజయ్యేనని దళితవర్గాలు భావించాయి. జాట్సన్ అనే ఒక దళితుడు కేసీఆర్ రాజయ్యనుద్దేశించి చేసిన వ్యాఖ్యలపై నిన్న ఎస్‌సీ-ఎస్‌టీ కమిషన్‌కు ఫిర్యాదుకూడా చేశాడు. మాదిగ దండోరా సంస్థ అధ్యక్షుడు మందకృష్ణ కేసీఆర్ వ్యాఖ్యలపై కరీంనగర్‌లో నిన్న తీవ్రంగా ప్రతిస్పందించారు. దళితుడిని ముఖ్యమంత్రి చేయకపోతే తల తెగ్గోసుకుంటానని గతంలో అన్న కేసీఆర్, ఇప్పుడు దళితులను మరోసారి అవమానించాడని, రాజయ్యను తొలగించాలని చూస్తున్నారని ఆరోపించారు. తెలంగాణ ప్రభుత్వంలో ఉన్నది మొత్తం ముగ్గురు మంత్రులేనని(కేసీఆర్, కేటీఆర్, హరీష్) విమర్శలు రావటం, రెవెన్యూమంత్రి ఈటెల రాజేందర్‌ను కేసీఆర్ తిట్టినట్లు వార్తలు రావటం మొదలైన అంశాల నేపథ్యంలో రాజయ్య వ్యవహారాన్ని పెద్ద ఇష్యూగానే చెప్పుకోవచ్చు. మరి ఇంత ముఖ్యమైన వార్తను ప్రధానంగానే ఇవ్వవలసి ఉంది. మరి ఈ వార్తకు ఈనాడులో లభించిన ప్రాధాన్యం చూస్తే....అసలు ఇవ్వలేదనే చెప్పుకోవాలి. ఎస్‌సీ-ఎస్‌టీ కమిషన్‌లో కేసీఆర్‌పై ఫిర్యాదు వార్త అసలు రానేలేదు. మందకృష్ణ స్పందనను ఆరవ పేజీలో ఒక మూల ఆరువాక్యాలతో సింగిల్ కాలమ్‌గా ఇచ్చారు. పోనీ తెలంగాణ ఉద్యమంఅంటే, తెరాస పార్టీ అంటే అంత సానుభూతి, అభిమానంఉందా అంటే అదీలేదు. తెలంగాణ ప్రభుత్వ అనుకూల వార్తను తెలంగాణ ఎడిషన్‌లలోనేమో ప్రభుత్వానికి అనుకూలంగా, ఆంధ్రప్రాంతంలో మరొకరకంగా మార్చి ఇవ్వటం తెలిసిందే.

తెలుగులో ప్రధాన దినపత్రికలన్నీ ఏదో ఒక రాజకీయపార్టీకో, వ్యాపారవేత్తకో అనుబంధసంస్థలైపోవటంవలన వచ్చిన అనర్ధం ఇదంతా. జరుగుతున్న పరిణామాలను ఆయా పత్రికలు తమతమ ప్రయోజనాలకనుగుణంగా మార్చి రాస్తున్నాయి. ఈనాడులో ఇలా తమకనుకూలంగా వార్తలను మార్చటం, ప్రతికూలమైన వార్తలను ఇవ్వకపోవటం పరిపాటిగా మారింది(ఇదే అంశంపై ఈ బ్లాగ్‌లో ఇంతకుముందు వచ్చిన వ్యాసాన్ని ఈ లింక్‌లో చూడొచ్చు.

టీవీ9, ఏబీఎన్ ఛానళ్ళపై అనధికార నిషేధం విషయంలో మిగిలిన తెలుగు మీడియా సంస్థలు ఉదాశీనంగా ఉండటంపై కాంగ్రెస్, బీజేపీవంటి రాజకీయపార్టీలు ఒకవైపు బహిరంగంగా విమర్శిస్తూఉండగా, మరోవైపు కేసీఆర్ దురహంకార, నియంతృత్వ(నేను హిట్లర్‌నేనని ఆయనే స్వయంగా వాక్రుచ్చారు) వైఖరిని జాతీయమీడియా(తెలంగాణకే చెందిన ప్రముఖ జాతీయస్థాయి పాత్రికేయుడు వెంకటనారాయణతోసహా) దుమ్మెత్తిపోస్తూ ఉండగా వాటిని ఏమాత్రం పరిగణనలోకి తీసుకోకుండా తమరిపాటికి తమరు ఇలా అధికార పార్టీకి బాకా ఊదుతూఉండటం సబబేనా రామోజీరావుగారూ!

                              ***

తెలంగాణ సంస్కృతిని, అస్తిత్వాన్ని ఎగతాళిచేసేవారిని, మీడియాసంస్థలను మెడలు విరగ్గొట్టి, భూమిలో పదికి.మీ. అడుగున పాతరేస్తానని కేసీఆర్ చేసిన వ్యాఖ్యలపై జాతీయ ఛానెళ్ళ చర్చలను ఈ క్రింది వీడియోలలో చూడొచ్చు... 


కొసమెరుపు: టైమ్స్ నౌ చర్చలో అర్ణబ్ గోస్వామి టీఆర్ఎస్ ఎంపీ వినోద్ నోరుమూయించినవైనం చూసితీరవలసిందేగానీ మాటలలో చెప్పలేము.

Monday, June 9, 2014

చంద్రబాబును అభినందించకుండా ఉండలేం!


ఏ వ్యక్తయినా విజయం సాధించగానే ఆ సమయంలో ఆ వ్యక్తిలోని సానుకూల అంశాలు ప్రముఖంగా కనబడతాయి. అయితే 2014 ఎన్నికలలో చంద్రబాబు సాధించిన విజయం ఆషామాషీది కాదు. పదేళ్ళపాటు అత్యంత కఠినాత్మక సమస్యలను, సవాళ్ళను ఎదుర్కొనికూడా పార్టీని కాపాడుకుంటూ తిరిగి అధికారపగ్గాలు చేపట్టటం ఒక విజయగాధ అనే చెప్పాలి. ఆయన విజయంనుంచి స్ఫూర్తి పొందవలసింది ఎంత అనేది తెలుసుకోడానికి ప్రయత్నిద్దాం. 


  • పదేళ్ళపాటు అత్యంత ప్రతికూల, కఠినాతి కఠిన పరిస్థితులను, అవమానాలను, హేళనలను ఎదుర్కొన్నారు. 
  • ప్రత్యర్ధి పార్టీలలోని గల్లీనాయకులనుంచి ఢిల్లీ నేతలదాకా ప్రతిఒక్కరూ చంద్రబాబును తిట్టేవారే. 
  • ఇక సొంతపార్టీనుంచి పలువురు అగ్రనాయకులు ఇతరపార్టీలకు క్యూకట్టటం. 
  • కుటుంబంలో అసంతృప్తితో రగులుతున్న ఒకవర్గం

ఒకానొక సమయంలో పార్టీ అస్తిత్వమే ప్రశ్నార్ధకంగా మారింది. ఇంతటి పరిస్థితులలో మరొకరైతే కాడిపారేసి పారిపోయేవారని చెప్పకతప్పదు. చంద్రబాబు వీటన్నంటినీ తట్టుకున్నారు. మళ్ళీ పార్టీని మళ్ళీ విజయందిశగా నడిపించి అధికారాన్ని చేపట్టారు. ఈ క్రమంలో ఆయన అనుసరించిన సహనం, ఓర్పు, సానుకూలవైఖరి, పట్టుదల, కృషి, ఆశావహదృక్పథం, తప్పులను తెలుసుకోవటం, వాటిని సరిదిద్దుకోవటంవంటి అంశాలు ఆయనకు మళ్ళీ విజయాన్ని ఎలా సాధించిపెట్టాయో పరికించండి. 

ఎన్‌టీఆర్ అహంకార వైఖరిపై, రాజ్యాంగేతరశక్తిగా లక్ష్మీపార్వతి జోక్యంపై నాటి టీడీపీ ఎమ్మెల్యేలలో పెల్లుబికిన వ్యతిరేకతను తనకనుకూలంగా మలుచుకుని చంద్రబాబునాయుడు 1995 ఆగస్ట్‌లో అధికారంలోకొచ్చిన సంగతి తెలిసిందే. తన తొమ్మిదేళ్ళపాలనలో కేవలం ఐటీ, పారిశ్రామికరంగాలపైనే దృష్టిపెట్టటం, వ్యవసాయం దండగ అని వివాదాస్పద వ్యాఖ్యలు చేయటం, ప్రభుత్వోద్యోగులపట్ల కఠినవైఖరి అవలంబించి వారిని శత్రువులను చేసుకోవటం, పార్టీ శ్రేణులను అంతగా పట్టించుకోకపోవటంతో ప్రజలలో బాగా వ్యతిరేకతను మూటగట్టుకున్నారు. మరోవైపు రాష్ట్రవ్యాప్తంగా పాదయాత్ర నిర్వహించిన వైఎస్ రాజశేఖరరెడ్డి ప్రజల అభిమానాన్ని చూరగొని 2004 ఎన్నికలలో అఖండమైన మెజారిటీతో అధికారంలోకి వచ్చారు. వచ్చీరావటంతోనే ఎన్నికలలో ఇచ్చిన ఉచితకరెంట్ హామీకి సంబంధించిన జీవోపై సంతకం చేశారు. చేయటమేకాక చంద్రబాబు ఆ హామీని ఎద్దేవా చేయటాన్ని, వ్యవసాయం దండగ అనటాన్ని బాగా ప్రచారం చేశారు. ఎన్నికలలో పరాజయంతోబాటు ఈ ప్రచారం బాగా జరగటంతో చంద్రబాబు మొదట్లో కొంతకాలంపాటు స్థాణువైపోయి స్తబ్దుగా ఉండిపోయారు. కాంగ్రెస్ ప్రభుత్వంపై బయటపడిన వోక్స్‌వాగన్, ఎలుగుబంటి సూర్యనారాయణవంటి కుంభకోణాలపై ప్రతిపక్షంగా చేయవలసిన కనీస ఉద్యమాలు, ఆందోళన కార్యక్రమాలుకూడా చేయలేదు. మరోవైపు వైఎస్ 'ఆకర్ష్' పేరుతో తెలుగుదేశంనుంచి అనేకమంది నాయకులను విజయవంతంగా కాంగ్రెస్ గొడుగుకిందికి లాగారు. ఇటు అసెంబ్లీలో చంద్రబాబుపై రోశయ్య, కిరణ్‌కుమార్‌రెడ్డి ప్రభృతులతో కలిసి ముప్పేటదాడి చేసేవారు. అది ఏ స్థాయికి వెళ్ళిందంటే, 'తల్లి కడుపులోనుంచి ఎందుకు బయటికొచ్చానా అని కుమిలిపోయేలా చేస్తాను' అంటూ వైఎస్ ఒక సందర్భంలో చంద్రబాబుపై సాక్షాత్తూ శాసనసభలోనే తీవ్రపదజాలంతోకూడిన వ్యాఖ్యలు చేశారు. వీటన్నింటినీ భరిస్తూనే చంద్రబాబు మెల్లగా పుంజుకుని ప్రతిపక్షనేతగా తన కర్తవ్యాన్ని నిర్వర్తించటం ప్రారంభించారు. 2009 ఎన్నికలు లక్ష్యంగా - కాంగ్రెస్ ప్రభుత్వంలో జరుగుతున్న భారీస్థాయి అవినీతిపై, ముఖ్యంగా జలయజ్ఞంపై ఉద్యమాలు చేపట్టారు. తాను మారిన మనిషినని, రియలైజ్ అయ్యానని వివిధ సందర్భాలలో చెప్పడంద్వారా తన తప్పులు తెలుసుకున్నట్లు అన్యాపదేశంగా ప్రకటించారు. ముఖ్యంగా వైఎస్ తనను నమ్ముకున్నవారికి అండగా నిలిచేతీరు విస్తృతంగా ప్రచారంలోకి వచ్చిన తర్వాత చంద్రబాబుకు ఆ కోణంలో తన లోపం బాగా అర్ధమయింది. కార్యకర్తలను బాగా పలకరించటం, వారి బాగోగులు తెలుసుకోవటం ప్రారంభించారు. ఈ పరిస్థితుల్లో 2008ఆగస్ట్‌లో 'ప్రజారాజ్యం' రూపంలో తెలుగుదేశానికి మరో సవాల్ ఎదురయింది. ఆరంభంలో పీఆర్‌పీ బ్రహ్మాండంగా దూసుకుపోయింది. చిరంజీవి ఎక్కడ పర్యటనకు వెళ్ళినా ప్రజలు పెద్దసంఖ్యలో హాజరై జేజేలు పలికారు. తెలుగుదేశంనుంచి అనేకమంది పాతకాపులు ప్రజారాజ్యంలోకి వెళ్ళిపోయారు. అయినప్పటికీ పార్టీని, నాయకత్వంపై పట్టును చంద్రబాబు కాపాడుకుంటూ వచ్చారు(అయితే అంత భారీస్థాయిలో దూసుకువచ్చిన ప్రజారాజ్యం రానురానూ పలచబడిపోయి 2009ఎన్నికలసమయానికి దిగజారిపోవటం వేరేవిషయం).

2009ఎన్నికలలో వామపక్షాలతో, తెలంగాణరాష్ట్రసమితితో మహాకూటమి పేరుతో తెలుగుదేశం పొత్తు పెట్టుకుంది. ఈ నిర్ణయం చంద్రబాబు చేసిన మరో అతిపెద్ద తప్పుఅని ఇప్పటికీ చాలామంది అంటుంటారు. ఈ పొత్తువలన టీడీపీ-టీఆర్ఎస్‌లలో టీఆర్ఎస్సే ఎక్కువ లాభపడింది. మరోవైపు సీమాంధ్రలో ప్రజారాజ్యం తెలుగుదేశం విజయావకాశాలకు తీవ్రంగా గండికొట్టింది. ప్రజారాజ్యం పార్టీ కాంగ్రెస్ ఓట్లనే చీలుస్తుందని, దానివలన తమకే లాభమని ఊహించుకుని సంబరపడిన టీడీపీ నేతలకు ఎన్నికల ఫలితాలలో ఝలక్ తగిలింది. ప్రజారాజ్యం కొన్నిచోట్ల కాంగ్రెస్ ఓట్లను, మరికొన్నిచోట్ల టీడీపీ ఓట్లను చీల్చుకోవటంతో టీడీపీకే ఎక్కువ నష్టం కలిగింది. మళ్ళీ చంద్రబాబుకు భంగపాటు తప్పలేదు. వైఎస్ అత్తెసరు మెజారిటీతో ప్రభుత్వాన్ని ఏర్పాటు చేశారు. అయితే సీట్లు దాదాపు వందదాకా రావటం కొంతలో కొంత టీడీపీకి ఊరటనిచ్చింది. 

2004ఎన్నికల తర్వాత మొదట్లో కొంతకాలం స్తబ్దుగా ఉన్న చంద్రబాబు, 2009ఎన్నికల తర్వాతమాత్రం అలా కాకుండా మొదటినుంచే మంచి నిర్మాణాత్మక ప్రతిపక్షపాత్ర పోషించారు. ప్రతిపక్షనేతగా ప్రజల తరపున, ప్రభుత్వానికి వ్యతిరేకంగా పలు కార్యక్రమాలు చేపట్టారు. ఈక్రమంలో బాబ్లీపై మహారాష్ట్ర ఆనకట్ట నిర్మాణాన్ని వ్యతిరేకిస్తూ 2010 జులైలో తమపార్టీ నేతలను తీసుకుని ఆనకట్ట నిర్మాణస్థలానికి వెళ్ళిన చంద్రబాబు బృందాన్ని మరాఠా ప్రభుత్వం దాదాపుగా తన్ని పంపించింది. అక్కడ పోలీసుల వైఖరికి చంద్రబాబు కళ్ళనీళ్ళపర్యంతమయ్యారు. తెలుగువారికి మహారాష్ట్ర ప్రభుత్వం ఇంత అవమానం చేసినా రాష్ట్రంలోని కాంగ్రెస్ ప్రభుత్వం దానిపై సరైన రీతిలో స్పందించకపోవటంపై విమర్శలు వ్యక్తమయ్యాయి. 

2009 సెప్టంబర్‌లో వైఎస్ ప్రమాదంలో ప్రాణాలు కోల్పోయిన తర్వాత రాష్ట్ర రాజకీయ యవనికపైకి వచ్చిన జగన్మోహన్‌రెడ్డి తనకు ప్రధాన శత్రువుగా చంద్రబాబునాయుడునే ఎంచుకున్నారు. ప్రతిదానికీ చంద్రబాబునాయుడుకు ముడిపెట్టి తిట్టటమే పనిగా పెట్టుకున్నారు. మరోవైపు 2009 చివరలో ఆర్టికల్ 14ఎఫ్ రద్దుకోసం కేసీఆర్ చేసిన ఉద్యమం పలుమలుపులు తిరిగి కేంద్రప్రభుత్వం తెలంగాణకు అనుకూలంగా ప్రకటనచేయటానికి దారితీసింది. అయితే దీనిపై సీమాంధ్రలో తీవ్రస్థాయిలో ఉద్యమాలు రగలడంతో నెలరోజులకే కేంద్ర తనప్రకటనను ఉపసంహరించుకుంది. ఈ పరిణామాలతో తెలంగాణ ఉద్యమం పతాకస్థాయికి చేరింది. అప్పటినుంచి ప్రారంభమైన ఉద్యమం 2013 జులైలో కేంద్ర ప్రభుత్వం తెలంగాణ ఏర్పాటును ప్రకటించేవరకు అప్రతిహతంగా సాగింది. ఈ సమయంలో తెలుగుదేశం అత్యంత పరీక్షా పరిస్థితులను ఎదుర్కొంది. విడవమంటే పాముకుకోపం, కరవమంటే కప్పకు కోపం అన్నట్లుండేది చంద్రబాబు పరిస్థితి. 

సీమాంధ్రలో వైసీపీ, తెలంగాణలో తెరాస తెలుగుదేశాన్ని రూపుమాపాలన్న లక్ష్యంతో పని చేశాయి. రెండుపార్టీలకూ కాంగ్రెస్‌తో లోపాయకారీ ఒప్పందం ఉండటంతో తెలుగుదేశాన్నే ప్రధానశత్రువుగా ఎంచుకున్నాయి. తమ అస్తిత్వంకోసం ప్రతి సమస్యకూ చంద్రబాబునే కారణంగా చూపటానికి ప్రయత్నించాయి. 'లక్షకోట్ల అవినీతి' ఆరోపణలు ఎదుర్కొంటున్న జగన్ కూడా తన ఓదార్పుయాత్రలలో ఉపన్యాసం మొదలుపెట్టినదగ్గరనుంచీ ప్రతిదానికీ చంద్రబాబునే ముడిపెట్టి తిడుతుండేవారు. మరోవైపు టీఆర్‌ఎస్ నాయకులు - చంద్రబాబువలనే తెలంగాణ ఆగిపోతోందని ఆరోపించేవారు. తెలంగాణలో టీడీపీ ఒక్కసీటుకూడా గెలుచుకోలేదని, ఎన్నికలతర్వాత ఆ పార్టీ కార్యాలయాలకు టులెట్ బోర్డ్‌లు పెట్టుకోవాల్సిందేనని ఎద్దేవా చేసేవారు. బాబు రెండుకళ్ళ సిద్ధాంతంపై జోకులు పేల్చేవారు. ఇక కాంగ్రెస్ నాయకులకుకూడా చంద్రబాబునే 'పంచ్‌బ్యాగ్‌'లాగా ఉపయోగించుకున్నారు. అయినదానికీ, కానిదానికీ బాబుకు మతిస్థిమితం తప్పిందనేవారు. ఇలా మూడుపార్టీలూ చంద్రబాబుపై ముప్పేటదాడి చేసేవి. టీఆర్ఎస్ అయితే ఒక అడుగు ముందుకేసి చంద్రబాబును తెలంగాణలో అడుగుపెట్టనీయమనేస్థాయికి వెళ్ళింది. 2012 జులైలో బాబు వరంగల్ జిల్లా పాలపర్తిలో రైతుయాత్రను తలపెడితే, తెలంగాణ గడ్డపై అడుగుపెడితే ఖబడ్దార్! అని టీఆర్ఎస్, తెలంగాణ జేఏసీ నేతలు హెచ్చరించారు. అయినప్పటికీ లెక్కచేయకుండా ఆ యాత్రను జరిపి పాలపర్తిలో బహిరంగసభలో చంద్రబాబు ఉపన్యసించారు. పాలపర్తి సభ చంద్రబాబులోని నాయకత్వ లక్షణాలను మరోసారి నిరూపించిందని చెప్పాలి. తెలంగాణ విషయంలో ఎవరెంతగా ఎద్దేవా చేసినా, తన రెండుకళ్ళ సిద్ధాంతాన్నిమాత్రం వీడలేదు. వాస్తవానికికూడా చంద్రబాబు తెలంగాణ ఉద్యమానికి మద్దతివ్వకపోయినా నష్టం చేసిందేమీలేదు. పైగా తెలంగాణకు అనుకూలంగా లేఖనుకూడా ఇచ్చిన విషయం మరిచిపోకూడదు. 

ఇక 2014ఎన్నికలు లక్ష్యంగా చంద్రబాబు 2012 అక్టోబర్ రెండవతేదీన 'వస్తున్నా మీకోసం' పాదయాత్రను అనంతపూర్ జిల్లా హిందూపూర్‌లో ప్రారంభించారు. 64 సంవత్సరాల వయస్సులో ఆయన పాదయాత్ర చేపట్టడం ఒకరకంగా సాహసమనే చెప్పాలి. కానీ అనేక క్లిష్టపరిస్థితులు ఎదుర్కొంటున్న పార్టీలో ఉత్తేజం నింపి విజయందిశగా నడపటానికి, ప్రజలలో మమేకమై వారి సమస్యలు తెలుసుకోవటానికి పాదయాత్ర ఒక్కటే ఉభయతారకమంత్రంగా బాబు నిర్ణయించుకున్నారు. తెలంగాణలో ఈ యాత్ర రంగారెడ్డి, మెదక్, నిజామాబాద్, అదిలాబాద్, కరీంనగర్, వరంగల్, ఖమ్మం, నల్గొండజిల్లాలలో సాగింది. టీఆర్ఎస్ నాయకులు పలు ఆటంకాలు, అవాంతరాలు కల్పించినప్పటికీ, తెలంగాణలో విజయవంతంగానే చంద్రబాబు ఈ పాదయాత్రను ముగించారు. అక్కడనుంచి సీమాంధ్రలోకి ప్రవేశించి విజయవంతంగా మొత్తం 207 రోజులపాటు పాదయాత్రను జరిపి 16 జిల్లాలలోని 84 నియోజకవర్గాలు, 160 మండలాలు, 1246 గ్రామాలను చుట్టారు. 2013 ఏప్రిల్ 28న ముగిసిన ఈ పాదయాత్రలో బాబు మొత్తం 2,800 కిలోమీటర్లు పర్యటించారు. ఈ క్రమంలో అనేక అవాంతరాలు, అంతరాయాలు ఏర్పడినా వాటిని అధిగమించి విజయవంతంగా కార్యక్రమాన్ని ముగించారు. సహజంగా ఏ నేతకైనా పాదయాత్రద్వారా క్షేత్రస్థాయిలో ప్రజల సమస్యలు, కష్టాలు నేతలకు అర్ధమవుతాయి. చంద్రబాబు స్వతహాగా తెలివైనవాడు, నిశిత పరిశీలన కలిగినవాడు కావటంతో పరిస్థితులను మరింత బాగా ఆకళింపు చేసుకున్నారు. అందుకే పాదయాత్ర తన జీవితంలో మరిచిపోలేని ఘట్టమని పేర్కొన్నారు. 

ఇక ఎన్నికలు వచ్చేశాయి. కాంగ్రెస్ ముఖ్యమంత్రుల మార్పు, వారిద్దరికీ(రోశయ్య, కిరణ్) పరిపాలనపై నియంత్రణలేకపోవటం, రాష్ట్రం అల్లకల్లోలంగా ఉండటంతో సీమాంధ్ర ప్రజలలో చంద్రబాబే మెరుగు అనే భావం విభజన ముందునాటికే ఏర్పడింది. దానికితోడు విభజన జరిగిన తర్వాత సీమాంధ్రను పాలించటానికి ఉన్న రెండు అవకాశాలలో(చంద్రబాబు-జగన్) చంద్రబాబే మెరుగనికూడా వారు భావించారు. బీజేపీతో పొత్తుపెట్టుకోవటం, తద్వారా పవన్ కళ్యాణ్ మద్దతు ప్రకటించటం టీడీపీకి కలిసొచ్చింది. జగన్ అవినీతిగురించి, కాంగ్రెస్-తెరాసతో అతని లోపాయకారీ ఒప్పందంగురించి తెలుగుదేశం ఎన్ని చెప్పినా అట్టడుగు స్థాయికి చేరని సందేశం, పవన్ కళ్యాణ్ చెప్పటంవలన చేరాల్సిన చోటికి చేరింది. వీటన్నంటితో ఒకప్పడు జగన్‌కు ఉవ్వెత్తున ఉన్న ప్రజాదరణ క్షీణించుకుంటూ పోయింది. తెలుగుదేశానికి స్పష్టమైన మెజారిటీ లభించింది. 

ఈ పదేళ్ళ బాబు ప్రస్థానంచూస్తే, ఎన్ని ప్రతికూల పరిస్థితులెదురైనా ఆయన మానసిక సంతులనాన్ని కోల్పోకుండా లక్ష్యంవైపే చేసిన ప్రయాణాన్ని ఎవరైనా ప్రశంశించకుండా ఉండలేరు. వీటన్నింటినీమించినది మరొకటి ఉంది. ఒక సానుకూల దృక్పథంతో, ఒక దీక్షతో ఆయన చేపట్టిన పాదయాత్ర అనే బృహత్తర కార్యక్రమం ఆయనను లక్ష్యానికి చేర్చింది. విచిత్రమేమిటంటే వైఎస్ 2004లో అధికారాన్ని చేపట్టటానికికూడా సానుకూలదృక్పథంతో చేపట్టిన ఇదే బృహత్తర కార్యక్రమమే కారణం కావటం. అప్పటివరకు వైఎస్ ఏ పని చేసినా, ఏ కార్యక్రమం చేపట్టినా ఒక ప్రతికూల వైఖరే ఉండేది. ఏ ముఖ్యమంత్రి గద్దెనెక్కినా వెనక అసమ్మతి శిబిరాలు నడపటం, ఆ ప్రభుత్వాన్ని అస్థిరపరచటంవంటి కార్యక్రమాలనే వైఎస్ చేస్తుండేవారు. అయితే మొదటిసారిగా 2003 వేసవిలో ఆయన ఒక సానుకూలవైఖరితో, 'ప్రజాప్రస్థానం' అనే పాదయాత్ర కార్యక్రమాన్ని చేపట్టారు. విజయాన్ని అందుకున్నారు. అయితే అధికారాన్ని చేపట్టాక ఆయన బడుగువర్గాలకు సంక్షేమ పథకాలనే ఎంగిలి మెతుకులు విసిరి ఆబగా అవినీతి, ఆశ్రిత పక్షపాతాలతో రాష్ట్రాన్ని గుల్లచేయటంతో 'కాలధర్మం' చెందటం వేరే విషయం. 

ఏది ఏమైనా అధికారాన్ని తిరిగి చేపట్టటంలో చంద్రబాబు అనుసరించిన వైఖరి, విధానాలనుంచి ప్రతిఒక్కరూ స్ఫూర్తిపొందాల్సింది ఎంతోకొంత ఉందనటంలే ఏమాత్రం సందేహంలేదు. అయితే అధికారం చేపట్టిన తర్వాత పాతరోజులను మరిచిపోతే ప్రజలు, ప్రకృతి ఆయనకు గుణపాఠం చెప్పటంమాత్రం ఖాయం.

Wednesday, May 14, 2014

గ్రేట్‌ఆంధ్ర.కామ్‌వారూ! ఇది సబబేనా?

బ్లాగ్ ప్రపంచంలో ఇప్పటికే ఈ కాపీకొట్టడాలు, చెత్తకామెంట్లకు జడిసి చాలామంది మంచి మంచి బ్లాగర్‌లు పోస్ట్‌లు రాయటం ఆపేశారు. ఇటీవల 'కష్టేఫలి' బ్లాగ్ శర్మగారుకూడా అస్త్రసన్యాసం చేయాలనుకున్నప్పటికీ మిగిలిన బ్లాగర్‌ల అభ్యర్ధనలను మన్నించి విరమించుకున్న విషయం తెలిసిందే. తాజాగా ఈ బ్లాగు రచయితకుకూడా కష్టేఫలి శర్మగారిలాంటి అనుభవం ఎదురైంది.

ఈనెల 12న ప్రముఖ తెలుగు చిత్రనిర్మాత కె.మురారి చెన్నైలో ప్రెస్‌మీట్ నిర్వహించి దర్శకుడు రాఘవేంద్రరావుకు గీతం యూనివర్సిటీవారు డాక్టరేట్ ఇవ్వటంపై స్పందించారు. రాఘవేంద్రరావువంటి సంస్కారహీనుడికి గౌరవ డాక్టరేట్ ఇవ్వటమేమిటంటూ ధ్వజమెత్తారు. ఈ ప్రెస్‌మీట్‌కు తెలుగు రిపోర్టర్‌లందరూ వెళ్ళినప్పటికీ రాఘవేంద్రరావుఅంటే భయమో, భక్తోగానీ 10టీవీతప్పితే మిగిలిన ఏ తెలుగు దినపత్రికగానీ, ఛానల్‌గానీ ఆ వార్తను ఇవ్వలేదు. 10టీవీవారుమాత్రం సమాచారం అందిన వెంటనే తమ చెన్నై రిపోర్టర్‌ ఫోన్ ఇన్ తీసుకుని దానిని ప్రసారం చేశారు.

యథాలాపంగా టీవీఛానళ్ళన్నిటినీ చూస్తూ 10టీవీలో ఆ వార్తను చూసిన ఈ బ్లాగర్ అదేరోజు మూడుగంటల ప్రాంతంలో దానిపై 'దర్శకేంద్రుడు రాఘవేంద్రరావుకు తృటిలో తప్పిన చెప్పుదెబ్బ' అంటూ ఒక పోస్ట్ రాయటం జరిగింది. గ్రేట్ ఆంధ్ర.కామ్‌వారు 13వ తేది ఉదయాన 'రాఘవేంద్రరావుకు చెప్పుదెబ్బలు తప్పాయట' అంటూ ఒక ఆర్టికల్ ఇచ్చారు(ఈ వెబ్‌సైట్‌వారు పోస్ట్ చేసే సమయం పదిగంటలు వెనకకు ఉంటుంది. అందుకనే ఆ ఆర్టికల్‌ను పోస్ట్ చేసిన సమయంచూస్తే 12వతేది రాత్రి పదిగంటలకు పోస్ట్ చేసినట్లుగా ఉంటుంది). ఈ రెండు ఆర్టికల్స్‌నూ గమనిస్తే వారు ఎలా కాపీ కొట్టినదీ అర్ధమవుతుంది. ఈ బ్లాగర్ అంతకుముందు ఈనాడుపై రాసిన ఆర్టికల్‌లోని లైన్‌ను కూడా గ్రేట్‌ఆంధ్రవారు ఇలాగే తీసుకుని కొద్దిగా అటూఇటూ మార్చి తమదైన శైలిలో 'నోరు జార్ చక్రవర్తి' అంటూ  ఇచ్చారు.  

దట్స్ తెలుగు.కామ్‌వారికైతే ఇలాంటి కంటెంట్ చౌర్యం సర్వసాధారణం. ఈ బ్లాగ్‌‌లో గతంలో ఉదయభానుగురించి రాసిన ఒకపోస్ట్‌నుంచి వారు చేసిన చౌర్యాన్ని ఇక్కడ చూడొచ్చు. ఈ బ్లాగ్‌పోస్ట్‌లోని పదాలనుకూడా వారు మక్కికిమక్కి దించేశారు. దాని తాలూకు స్క్రీన్‌షాట్‌నుకూడా ఇక్కడ చూడొచ్చు.




ఎవరైనా ఈ బ్లాగులలో విషయం బాగుందనిపించి మరోచోట వినియోగించదలుచుకుంటే సదరు బ్లాగ్ రచయిత అనుమతి తీసుకోవటం నైతిక సంప్రదాయం. కాబట్టి గ్రేట్ఆంధ్రవారూ! తమరు ఆ నైతిక సంప్రదాయాన్ని పాటిస్తే బాగుంటుందని మనవి.

                                                    
                                                ***


p.s. ఈ బ్లాగ్‌లోని కంటెంట్‌ తీసుకోవాలనుకునాలనుకునేవారు, కంటెంట్ సేవలు అవసరమైనవారు ఈ ఇ-మెయిల్ ఐడీని - tejasswi11@gmail.com సంప్రదించగలరు.


Thursday, April 24, 2014

పవన్‌కై చంద్రబాబు వెంపర్లాటను ఆ రెండు వర్గాలూ జీర్ణించుకోగలవా!



మంగళవారం హైదరాబాద్‌లో జరిగిన మోడి సభలో తనతో అంటీ ముట్టనట్లుగా వ్యవహరించిన పవన్ కళ్యాణ్‌ను చంద్రబాబునాయుడు నిన్న స్వయంగా అతని కార్యాలయానికి వెళ్ళి మరీ కలుసుకోవటం తెలుగుదేశంపార్టీలో అంతర్గతంగా కలకలం సృష్టించింది. తెలుగుదేశం శ్రేణులలోని ఒక వర్గానికి, నందమూరి కుటుంబంలోని హరికృష్ణ వర్గానికి ఇది జీర్ణించుకోలేని పరిణామమని చెప్పొచ్చు.

మొదటివర్గం కోణంచూస్తే, తెలుగుదేశంలో కోస్తాలోని శ్రేణులలో ఒక సామాజిక వర్గం చంద్రబాబు-పవన్ భేటీ వ్యవహారంపై లోలోపల రగిలిపోతోంది. ముఖ్యంగా ప్రకాశం, గుంటూరు, కృష్ణా, గోదావరి జిల్లాలలోని టీడీపీ శ్రేణులు తల కొట్టేసినట్లయిందని భావిస్తున్నారు. దీనికి మూలాలు ఈనాటివికావు. తెలుగుదేశాన్ని తమ సొంతసంస్థగా పరిగణించే కమ్మ సామాజికవర్గానికీ, పవన్ కళ్యాణ్ సామాజికవర్గమైన కాపులకు కోస్తాలో చిరకాలంగా బద్ధవైరమున్న సంగతి తెలిసిందే. ఊళ్ళలో ఈ రెండు సామాజికవర్గాలకు చెందిన సినీ అభిమానులుకూడా తమ తమ వర్గాలకు చెందిన నందమూరి, మెగా హీరోలకు 'బై డిఫాల్ట్' అభిమానులుగా మారిపోతుంటారు. ఒకరిపై మరొకరు కత్తులు దూసుకుంటుంటారు. ఇలాంటి పరిస్థితుల్లో చంద్రబాబునాయుడు పవన్ కళ్యాణ్‌వద్దకే స్వయంగా వెళ్ళటమేకాక, ఒక పెద్దనేతను కలుసుకున్నపుడు చెప్పినట్లుగా 'మర్యాదపూర్వకంగా కలుసుకున్నాను' అనిచెప్పటం,  కోస్తాలోని ఆయన వర్గంవారు భరించలేకపోతున్నారు. మరోవైపు తనవద్దకు వచ్చిన చంద్రబాబువద్ద పవన్ కళ్యాణ్ హావభావాలు, బాడీ లాంగ్వేజ్ లెక్కలేనట్లుగా ఉండటం వారికి పుండుమీద కారం రాసినట్లుంది.

ఇక రెండోవర్గం కోణంచూస్తే, హరికృష్ణ, ఆయన కుమారుడు మినీ ఎన్‌టీఆర్‌కుకూడా ఇది జీర్ణించుకోలేని పరిణామమేనని చెప్పొచ్చు. హిందూపూర్ టికెట్ నిరాకరించబడటంతో హరికృష్ణ, ఆయన కుమారుడు లోలోపల రగిలిపోతున్న విషయం తెలిసిందే. మరోవైపు జూనియర్ ఎన్‌టీఆర్‌ను ప్రచారానికి బొట్టుపెట్టి పిలవాల్సిన అవసరంలేదంటూ బాలయ్య, లోకేష్ ప్రకటనలు ఇచ్చిన సంగతికూడా విదితమే(పైపెచ్చు, జూనియర్ ఎన్‌టీఆర్‌కు ప్రత్యేకంగా ఫ్యాన్స్ లేరని, ఉన్నదంతా నందమూరి ఫ్యాన్సేననికూడా బాలయ్య కుండబద్దలు కొట్టారు). కాగా, ఇంట్లోనే ఉన్న స్టార్ - ఎన్టీఆర్‌ను పట్టించుకోని చంద్రబాబు, పవన్ కళ్యాణ్‌వద్దకు వెళ్ళి బ్రతిమలాడటం హరికృష్ణ అండ్ సన్స్‌ అవమానాలను రెట్టింపు చేసినట్లయిందని చెప్పొచ్చు.

ఏది ఏమైనా టీడీపీ అధినేత చంద్రబాబునాయుడుగానీ, లోక్ సత్తా అధినేత జయప్రకాష్ నారాయణగానీ తమ మాటల్లో పదే పదే పవన్ కళ్యాణ్‌ను ప్రస్తావించటానికి, అతని మద్దతుకోసం ప్రయత్నించటానికి కారణం అతనిమీద ప్రేమకాదని, యూత్‌లోనూ, అతని సామాజికవర్గంలోనూ ఉన్న ఫాలోయింగేనన్నది తెలిసిన విషయమే. దానికితోడు జూనియర్ ఎన్‌టీఆర్ లేని లోటును పవన్‌ద్వారా అధిగమించాలని చంద్రబాబు ప్రయాస పడుతున్నారు. తన మిత్రుడు పొట్లూరి వరప్రసాద్‌కు విజయవాడ టికెట్ ఇవ్వలేదని చంద్రబాబుపై గుర్రుగా ఉన్న పవన్, మొత్తానికి నిన్నటిభేటీ తర్వాత మెత్తబడ్డట్టే ఉన్నారు. రేపటినుంచి టీడీపీ, బీజేపీ తరపున ప్రచారంలో పాల్గొంటున్నట్లు ఇవాళ ప్రకటన విడుదలచేశారు. పవన్ మద్దతువలన ఫలితాలు గణనీయంగా మారతాయని చెప్పలేముగానీ, తెలుగుదేశానికి ఎంతోకొంత లబ్దికలుగుతుందనిమాత్రం చెప్పొచ్చు.

Saturday, April 19, 2014

ఉదయభాను ఓవరాక్షన్

టీవీ9 ఛానల్‌వారు ఉదయభాను ప్రయోక్తగా ప్రైమ్‌టైమ్‌(రాత్రి 9.30)లో నిగ్గదీసి అడుగు అనే కార్యక్రమాన్ని  ఇటీవల ప్రారంభించిన విషయం తెలిసిందే. ఎన్నికలవేళ ఎంపికచేసిన కొన్నిప్రాంతాలకు వెళ్ళి అక్కడ నెలకొనిఉన్న సమస్యలను ప్రజలద్వారా తెలుసుకుని, వాటిపై స్థానిక ప్రజాప్రతినిధులను నిలదీయటం అనే కాన్సెప్ట్‌తో టీవీ9 ఈ కార్యక్రమాన్ని ప్రారంభించింది. వాస్తవానికి టీవీ9లోనే ఝాన్సీ చాలారోజులనుంచి ఇలాంటి కాన్సెప్ట్‌తోనే, స్థానిక సమస్యలపై చేతన అనే కార్యక్రమాన్ని విజయవంతంగా నిర్వహిస్తోంది. అయితే, 'గంగ గరుడాలెత్తుకెళ్ళేరా...ఇంక ఆంబోతులాట సాగేరా' అంటూ సాగే అనే ఒక పాటను స్వయంగా రచించి, పాడి తనలోని సామాజికస్పృహ కోణాన్ని చాటిచెప్పిన ఉదయభాను అయితే ఈ కార్యక్రమానికి యాంకర్‌గా సముచితంగా ఉంటుందని భావించారో, ఏమో టీవీ9వారు ఆమెను రంగంలోకి దించారు.

కార్యక్రమం కాన్సెప్ట్ బాగున్నప్పటికీ, ఉదయభాను తెచ్చిపెట్టుకుని ప్రదర్శిస్తున్న నాటకీయత, ఓవరాక్షన్‌ చూడటానికి ఎబ్బెట్టుగా అనిపిస్తోంది. సినిమాలలో రాజకీయనాయకులకు వ్యతిరేకంగా ఉపయోగించే అన్యాయం, నిర్లక్ష్యం, నిరాదరణ వంటి కొన్ని పడికట్టుపదాలు పట్టుకుని ఉదయభాను ఊదరగొడుతున్నారు. ఆమెకు క్షేత్రస్థాయిలో సమస్యలపట్ల మౌలికమైన అవగాహన లేకపోగా, విషయపరిజ్ఞానంకూడా అంతంతమాత్రమే అవటంతో కార్యక్రమం అక్కడక్కడా నవ్వు తెప్పిస్తోంది. మొన్నొకచోట ఒక వృద్ధుడు ఏదో సమస్యను ఆవేశంగా ప్రస్తావిస్తుండగా, అతనిని ఆపి నీ వయసు ఎంత అని అడిగారు ఉదయభాను. తన వయసు 75 ఏళ్ళు అని అతను చెప్పాడు. వెంటనే ఈమె, 'కొంతమంది ముసలివాళ్ళు పుట్టుకతో యువకులు' అని శ్రీశ్రీ అన్నారని(#*@&#*), దానికి ఈయనే ఉదాహరణ అంటూ ఏదోదో చెప్పుకెళ్ళారు. ఇక ప్రజా ప్రతినిధులను పట్టుకుని వేలుచూపిస్తూ సినీ ఫక్కీలో ప్రశ్నలు అడగటంకూడా ఓవర్‌గా అనిపిస్తోంది.

అయితే కార్యక్రమాన్ని రూపొందించినవారిని, వారి కాన్సెప్ట్‌ను ప్రశంసించి తీరాలి. కార్యక్రమం చేయబోయే ప్రాంతానికి సంబంధించి ముందే సమాచారం సేకరించటం, ముందుగా యాంకర్‌తో ఆ వివరాలను చెప్పించటం, సమస్యలను ప్రస్తావించటం బాగుంది. ఎంపికచేసిన ప్రాంతాలుకూడా సముచితంగా ఉన్నాయి. ఇప్పటివరకు అనంతపూర్, ఖమ్మం, అదిలాబాద్, కర్నూలు, నిజామాబాద్, వరంగల్, మహబూబ్‌నగర్ ప్రాంతాలలో కార్యక్రమాన్ని నిర్వహించారు. ఉదయభాను ఓవరాక్షన్ తగ్గించుకుంటే కార్యక్రమం ప్రయోజనం మరింతబాగా నెరవేరుతుంది. 

Friday, April 18, 2014

నిన్నటి 'ఈనాడు'లో తీవ్ర తప్పిదం - నిర్లక్ష్యమా, ఉద్దేశపూర్వకమా?





శుక్రవారం(18.4.14) ఉదయానికి  తెలుగువారికి సంబంధించిన రెండు రాష్ట్రాలలోనూ అతిముఖ్యమైన వార్త అది. అన్ని దినపత్రికలూ సహజంగానే ఆ వార్తను ప్రాధాన్యతాక్రమంలో అత్యంత ముఖ్యమైన స్థానమైన పైవరుసలో(పత్రికా పరిభాషలో దీనిని బ్యానర్ వార్త అంటారు) ఇచ్చాయి. కానీ  తెలుగులో లార్జెస్ట్ సర్క్యులేటెడ్ దినపత్రిక అయిన 'ఈనాడు'లోమాత్రం భూతద్దం పెట్టి వెతికినా అది కనబడదు. ఆ వివరాలేమిటో చూడండి.

తెలుగుదేశానికి, భారతీయజనతాపార్టీకి మధ్య సీమాంధ్రలో పొత్తుకు సంబంధించి గురువారంనాడు విభేదాలు పొడసూపటం, ప్రతిష్టంభన నెలకొనటం తెలిసిందే(శుక్రవారం సాయంత్రానికి విభేదాలు సమసిపోయాయి...అది వేరే విషయం). స్వయంగా టీడీపీ అధినేత చంద్రబాబునాయుడే గురువారంసాయంత్రం విజయనగరంలో ఎన్నికల ప్రచారసభలో మాట్లాడుతూ, పొత్తువల్ల లాభంకన్నా నష్టమే ఎక్కువగా కలిగేటట్లుందని చెప్పారు. దీంతో న్యూస్ ఛానల్స్ అన్నింటిలో గురువారం మధ్యాహ్నందగ్గరనుంచీ ఇదే పెద్ద వార్తయి కూర్చుంది. గంటగంటకూ అప్ డేట్స్, ఫోన్ ఇన్స్, చర్చా కార్యక్రమాలు సాగాయి. ఇక శుక్రవారం ఉదయం వచ్చే దినపత్రికలన్నింటిలో ఇదే మొదటి, అతిముఖ్యవార్త అయింది(రెండురాష్ట్రాలకు సంబంధించికూడా శుక్రవారం ఉదయానికి దీనికిమించి పెద్దవార్తలేదు). ఆ వార్త ప్రాధాన్యానికి తగ్గట్టుగానే ఇవాళ్టి అన్ని దినపత్రికలలో బ్యానర్ వార్తగా వచ్చింది(టైమ్స్ ఆఫ్ ఇండియా, ఆంధ్రజ్యోతి పేపర్లలో ఇవాళ్టి బ్యానర్ వార్తలను పైన ఇమేజిలలో చూడొచ్చు). 'ఈనాడు'లో మాత్రం ఈ వార్త అసలు కనబడనేలేదు. వెబ్ ఎడిషన్ లోని 'ఈ- పేపర్'లో మాత్రం ఎనిమిదోపేజీలో ఎడమవైపు క్రింద మూలన ఒక చిన్నవార్తగా ఇచ్చారు(ఆఖరి ఇమేజ్ లో ఆ వార్తను చూడండి).

అక్కడ ఇచ్చిన వార్తలోకూడా వారు ఆ వార్తకు పెట్టిన శీర్షిక చూస్తే...'భాజపా, తెదేపా పొత్తుపై మథనం'. ఒక పక్కన తెగతెంపులు చేసుకోవాలనుకుంటున్నట్లు చంద్రబాబు స్వయంగా చెప్పటం, పొత్తుపై ప్రతిష్టంభన ఏర్పడటం కళ్ళకు కట్టినట్లు కనబడుతుంటే 'పొత్తుపై మథనం' అని శీర్షిక పెట్టటమంటే వార్త ప్రాధాన్యతను తక్కువ చేయాలని సంపాదకవర్గం నిశ్చయించుకున్నట్లనిపిస్తోంది.


ఏది ఏమైనా, లార్జెస్ట్ సర్క్యులేటెడ్ స్థాయి దినపత్రికలో ఇంత పెద్దతప్పుదొర్లటం దారుణం. తమ ప్రాధామ్యాలకోసమే వార్తను ఉద్దేశపూర్వకంగానే పక్కనపెడితేమాత్రం అది క్షమించరాని తప్పిదం. సంపాదకవర్యులూ! ఈ తప్పిదంపై పాఠకులకు వివరణ ఇవ్వాల్సిన కనీసబాధ్యత తమపై ఉందేమో ఒకసారి ఆలోచించండి.

Friday, April 11, 2014

చిరంజీవి, మోహన్‌బాబులపై బాలయ్య సెటైర్లు


హైదరాబాద్‌లో గురువారంరాత్రి జరిగిన లెజెండ్ విజయోత్సవ సభలో హీరో బాలయ్య చిరంజీవి, మోహన్‌బాబులపై చెణుకులు విసిరారు. లెజెండ్ టైటిల్‌గురించి వివరించే సందర్భంలో ఈ వ్యాఖ్యలు చేశారు. ఈ టైటిల్ మాస్‌కు అర్థమవుతుందో, లేదోనని మొదట సందేహించామని తెలిపారు. అయితే ఆమధ్య కొందరు లెజెండ్ ఎవరంటూ కొట్టుకుని ఆ పదాన్ని పాపులర్ చేశారంటూ లెజెండ్ పురస్కారంపై గతంలో మోహన్‌బాబు, చిరంజీవి మధ్య జరిగిన గొడవను పరోక్షంగా ప్రస్తావించారు. తాము ఈ టైటిల్ పెట్టటంద్వారా అసలు లెజెండ్ ఎవరో, ఏమిటో ప్రేక్షకులకు చూపించామన్నారు.

సినీపరిశ్రమలోగానీ, రాజకీయాలలోగానీ తన తండ్రి ఎన్‌టీరామారావు ఒక్కరే లెజెండ్ అని బాలయ్య చెప్పారు. ఇది తన ఒక్కడి అభిప్రాయం కాదని, అందరిదీనన్నారు. ఎన్‌టీఆర్‌ను మరిచిపోయి లెజెండ్ ఎవరు...ఎవరు అని వెతికేవారు పిచ్చివాళ్ళని, అలా వెతికేవారికి పిచ్చెక్కిందేమోనని ప్రజలు అనుకుంటారని(#*@!?*#!) చెప్పారు.

తెలుగు సినీపరిశ్రమ వజ్రోత్సవాలలో లెజెండ్ అంటూ కొందరికి పురస్కారాలు ఇస్తూ తనను పట్టించుకోకపోవటంపై తాను లెజెండ్ కాదా అంటూ మోహన్‌బాబు గొడవకు దిగటం, చిరంజీవి దానికి ఆవేశపూరితంగా సమాధానం ఇవ్వటం తెలిసిందే.   

బాలయ్య చెప్పిన మాటలను యధాతధంగా చూడాలనుకుంటే ఈ లింక్‌లోని వీడియోను చూడండి - https://www.youtube.com/watch?v=-KCRJIuj0vc#t=77 

Thursday, April 10, 2014

టీఆర్ఎస్ గొంతుకలై గర్జించే శ్రవణ్, కర్నె ప్రభాకర్‌లకు కేసీఆర్ మొండిచెయ్యి



తెలంగాణ రాష్ట్రసమితి వాదాన్ని వివిధ వేదికలపై, టీవీ చర్చా కార్యక్రమాలలో బలంగా వినిపించే వారిలో డాక్టర్ దాసోజు శ్రవణ్, కర్నె ప్రభాకర్ ముందుంటారు(ఇంతకుముందు రఘునందన్‌రావుకూడా ఈ జాబితాలో ఉండేవారు. అయితే ఆయన గత ఏడాది మే నెలలో పార్టీనుంచి సస్పెన్షన్‌కు గురయ్యారు). పార్టీ అధికార ప్రతినిధులు మరెందరో ఉన్నా, ప్రత్యర్ధి పార్టీల నాయకుల విమర్శలను, వాదనలను తిప్పికొట్టడంలో వీరిద్దరిదే పైచేయిగా ఉంటుంది. అయితే పార్టీకోసం ఇంత గొంతుచించుకుని అరిచిన వీరిద్దరికీ పార్టీ అధినేత మొండిచెయ్యే చూపారు.

శ్రవణ్ గతంలో ప్రజారాజ్యంలో చురుకైన పాత్ర పోషించారు. పవన్ కళ్యాణ్‌కు సన్నిహితంగా మెలుగుతూ ఆయన సిఫార్సుద్వారా సికింద్రాబాద్ పార్లమెంట్ టికెట్ సాధించి ఎన్నికల్లో నిలబడి ఓడిపోయారు. ఆ తర్వాత ప్రజారాజ్యానికి రాజీనామా చేసి టీఆర్ఎస్‌లో చేరారు. ఉస్మానియా యూనివర్సిటీనుంచి డాక్టరేట్ పొందిన శ్రవణ్, మంచి ఆలోచనాపరుడు, వక్త కావటంతో తక్కువ సమయంలోనే టీఆర్ఎస్‌లో పొలిట్‌బ్యూరోలో స్థానం సంపాదించుకున్నారు. ఈ ఎన్నికల్లో భువనగిరి, ముషీరాబాద్‌లలో ఏదో ఒకస్థానంలో పోటీచేయాలని ప్రయత్నించారుగానీ  టికెట్‌ దక్కలేదు.

ఇక పార్టీ కార్యక్రమాల అమలుకమిటీ ఛైర్మన్ కర్నె ప్రభాకర్ మొదటినుంచీ కేసీఆర్‌కు నమ్మినబంటుగా ఉన్నారు. నల్గొండజిల్లా మునుగోడు అసెంబ్లీ నియోజకవర్గంనుంచి టికెట్‌కోసం చాలాకాలంగా ప్రయత్నిస్తున్నారు. అయినప్పటికీ ఆయనకు నిరాశే మిగిలింది. కూసుకుంట్ల ప్రభాకరరెడ్డికి ఆ టికెట్‌ను కేటాయించారు.

పొద్దున లేచినదగ్గరనుంచీ పార్టీకి మద్దతుగా వాదిస్తూ, పార్టీని, నాయకులను భుజానకెత్తుకుని ప్రత్యర్ధులపై ఒంటిమీద దూసుకెళ్ళే వీరు, టికెట్‌లు దక్కకపోవటంవలన ఎంత నిరాశకు గురై ఉంటారో తేలిగ్గా ఊహించుకోవచ్చు. మరోవైపు, పార్టీ టికెట్‌లు ఆశించి భంగపడ్డవారిని విడివిడిగా పక్కకు పిలిచి, టీఆర్ఎస్ ప్రభుత్వంలో మొదట ఎమ్మెల్సీ ఇచ్చేది నీకేనంటూ ఆశలు కల్పించి మైమరిపిస్తున్నారట మాటల మరాఠీ.

                                                                -------


Looking for Content Writers for Telugu web audience?

కంటెంట్ రైటింగ్ సేవలు కావలసినవారు సంప్రదించగలరు 

tejasswi11@gmail.com


image courtesy: tv9

Wednesday, April 9, 2014

"అయన వస్తున్నాడు" వర్సెస్ "ఆయన వస్తేనే బాగుంటుంది "




గతకొద్దిరోజులుగా న్యూస్ ఛానల్స్ చూస్తున్నవారికి పై రెండు స్లోగన్‌ల గురించి వివరించి చెప్పనవసరంలేదు. చూడనివారికోసం వివరణ - పై రెండు స్లోగన్‌లూ రెండు వేర్వేరు రాజకీయపార్టీల ఎన్నికల ప్రచార చిత్రాలలోనివి. మొదటిదేమో జగన్ పార్టీది, రెండేదేమో తెలుగుదేశానిది. 

జగన్ పార్టీ ప్రచారచిత్రాలలో  ముందు ఏదో ఒక అక్రమాన్ని చూపిస్తారు. ఆ తర్వాత బాధితులవర్గంలోని ఒక వ్యక్తి లేచి ఇంకెన్నాళ్ళు మీ అక్రమాలు, ఆయనొస్తున్నాడు ఎలుగెత్తి అరుస్తారు. ఇంతలో పెద్ద ఎత్తున గాలి, దుమారం వస్తాయి. ఆ వెంటనే మీసాల రామ్ అన్నయ్య(ఈయన ఈ మధ్యనే సాక్షిలోకి రీఎంట్రీ ఇచ్చారు) తన బేస్ వాయిస్‌లో ఫ్యాన్ గుర్తుకు ఓటేయండి, దుమ్ము దులపండి అంటూ పిలుపునిస్తారు. థమ్సప్ యాడ్‌లోలా గాలి, దుమారాన్ని చూపటంపై జోకులు బాగా పేలుతున్నాయి...'వచ్చేదెవరూ! వైఎస్ దెయ్యమా?' అని.

ఇక తెలుగుదేశం ప్రచారచిత్రాలలో ముందుగా, పెరిగిపోతున్న ధరలు, కరెంట్ కోత వంటి ఏదో ఒక సమస్యను ప్రస్తావిస్తారు. స్క్రీన్ అంతా బ్లాక్ అండ్ వైట్‌లో ఉంటుందిగానీ, ఎక్కడో ఒక్కచోటమాత్రమే పసుపురంగు కనిపిస్తూఉంటుంది. సమస్యగురించి పాత్రలు మాట్లాడుకున్న తర్వాత ముక్తాయింపుగా "ఆయనున్నప్పుడే బాగుండేది, మళ్ళీ ఆయన వస్తేనే బాగుంటుంది" అని ఒకరితో చెప్పిస్తారు. ఆ వెంటనే చంద్రబాబు తలకాయ స్లో మోషన్‌లో ఇటువైపుకు తిరుగుతుంది. అయితే క్లోజప్‌లో చూపించటంవల్లనో, ఏమోగానీ చంద్రబాబు ముఖంలో నవ్వు కృతకంగా, కళావిహీనంగా ఉంది. ఈ చిత్రాలను రూపొందించిన దర్శకుడు, నటుడు అల్లరి రవిబాబు, జగన్ పార్టీ ప్రచారచిత్రాలను చూసి పోటీగా అదే థీమ్‌తో తీయటంకాక మరేదైనా కొత్తగా ప్రయత్నించాల్సిందన్న విమర్శలు వ్యక్తమవుతున్నాయి.

Tuesday, April 8, 2014

స్టార్‌ప్లస్ మహాభారతం సీరియల్‌లో మూలకథకు దారుణ వక్రీకరణ



దూరదర్శన్‌లో 80వ దశకం చివరలో ప్రతి ఆదివారం ఉదయం ప్రసారమైన రామాయణం, మహాభారతం హిందీ సీరియల్స్‌ను భాషతో సంబంధంలేకుండా దేశవ్యాప్తంగా అత్యధికశాతం ప్రజలు ఆదరించారు. రామానంద్ సాగర్(రామాయణం), బీఆర్ చోప్రా(మహాభారతం) ఆ సీరియళ్ళలో వివిధ పాత్రల స్వభావచిత్రణలో, నిర్మాణ ప్రమాణాలలో, సాంకేతిక విలువలలో ప్రశంశనీయమైన పనితీరు కనబరిచారు. పిల్లా, పెద్దా అందరినీ ఆ సీరియల్స్ విపరీతంగా ఆకట్టుకున్నాయి. ఆ సీరియళ్ళ ప్రసార సమయంలో రోడ్లపై ట్రాఫిక్ గణనీయంగా తగ్గిపోయేదంటే వాటికున్న ప్రజాదరణను అంచనావేయొచ్చు. సాగర్, చోప్రా ఇరువురూ తమ సీరియల్స్ నిర్మాణంకోసం పాత తెలుగు పౌరాణిక చిత్రాలను అనుసరించటం మరో విశేషం.

ఇక ప్రస్తుతానికి వస్తే, హిందీ ఎంటర్‌టైన్‌మెంట్ ఛానల్ స్టార్‌ప్లస్‌లో గత ఏడాది సెప్టెంబర్‌నుంచి రాత్రి 8.30గంటలకు మహాభారతం సీరియల్ ప్రసారమవుతున్న సంగతి చాలామందికి తెలిసే ఉంటుంది. స్వస్తిక్ ప్రొడక్షన్స్ అనే సంస్థ దాదాపు రు.120 కోట్ల ఖర్చుతో ఈ సీరియల్‌ను నిర్మిస్తోంది. మెలోడ్రామాకోసం ఈ సీరియల్ దర్శక, రచయితలు మూలకథను ఇష్టమొచ్చినట్లు మార్చేస్తూ పాత్రల స్వభావాలను తమకనుగుణంగా రూపుదిద్దుతున్నారు. వీరి వక్రీకరణ గురించి మచ్చుకు చెప్పాలంటే, యజ్ఞంద్వారా లభించిన ద్రౌపదిఅంటే ద్రుపదుడికి తీవ్ర ద్వేషం ఉందని వీరి భాష్యం. వాస్తవానికి, అర్జునుడికి భార్య కాగలిగే కుమార్తెను, ద్రోణాచార్యుడిని అంతమొందించే కుమారుడిని కోరుకుంటూ ద్రుపదుడు యజ్ఞం చేస్తాడు. ఇక్కడమాత్రం దానికి పూర్తి విరుద్ధంగా తీశారు. ద్రౌపది జన్మ వృత్తాంతాన్ని సాగదీసి ఐదారు ఎపిసోడ్‌లపాటు లాగారు. ఆ ద్రౌపది పాత్రధారిని చూస్తే ఏ మూలా అందంగానీ, మంచి రూపురేఖలుగానీ ఉన్నట్లు కనబడవు. దాసికి ఎక్కువ, చెలికత్తెకు తక్కువ.

ఇక ద్రౌపదీ వస్త్రాపహరణం సందర్భంగా ధృతరాష్ట్రుడు, కర్ణుడు చెప్పిన డైలాగులు పరమ దారుణంగా, వారి పాత్ర స్వభావాలకు పూర్తి విరుద్ధంగా ఉన్నాయి. నిండుసభకు తనను లాక్కుని రావటంపై ద్రౌపది ధృతరాష్ట్రుడిని ప్రశ్నిస్తే, దాసివి కాబట్టి దుర్యోధనుడి ఆదేశాలు పాటించి తీరాలంటాడు. కర్ణుడేమో ఆమెను వేశ్య అని నిర్వచిస్తాడు. వాస్తవకథలో వీరిద్దరికీ ధర్మం తెలిసినా, దుర్యోధనుడితో ఉన్న అనుబంధం కారణంగా అతనిని అడ్డుకోరు. ఇక్కడమాత్రం వీరిద్దరి పాత్రలను భ్రష్టు పట్టించారు. తెరపైన నిండుగా, భారీగా కనిపించటం తప్పించి, పాత్రల భావోద్వేగాలను కెమేరా ఎక్కడా చూపించలేకపోవటం మరో పెద్దలోపం. ముఖ్యంగా ద్రౌపదికి నిండుసభలో అవమానం జరుగుతుంటే పంచపాండవులు ప్రదర్శించిన భావోద్వేగాలు చాలా పేలవంగా ఉన్నాయి. ఆ ఐదుగురూ ఈ ఎపిసోడ్ మొత్తం కన్నీరు కార్చటమొక్కటే చేశారు.

అయితే ఈ సీరియల్‌లో ఏకైక మంచి అంశమైన కృష్ణుడి పాత్రధారి గురించి తప్పక ప్రస్తావించి తీరాలి. అత్యంత ప్రజాదరణ పొందిన మహాదేవ సీరియల్‌లో విష్ణుమూర్తి పాత్రధారి సౌరభ్ రాజ్‌ జైన్ ఈ మహాభారతంలోనూ కృష్ణుడి పాత్రను పోషించారు. అతను మాత్రం ఆ పాత్రకు అతికినట్లు సరిపోయాడని చెప్పాలి. ముఖ్యంగా చక్కటి ముఖం, ఆ ముఖంలో ప్రశాంతత, చిద్విలాసం -  జగన్నాటక సూత్రధారికి ఉండాల్సిన లక్షణాలన్నీ అతనిలో ఉండటం విశేషం.

మహాభారతం ఆధారంగా తెలుగులో తీసిన మాయాబజార్‌వంటి చిత్రాలలో మూలకథకు కొద్దిగా మార్పులు, చేర్పులు చేశారుగానీ, పాత్రల స్వభావాలను, అందునా ప్రధాన పాత్రల స్వభావాలను ఎక్కడా ఇష్టమొచ్చినట్లు మార్చలేదు. మహాభారతం, రామాయణంవంటి పురాణాలగురించి తెలియని ఇప్పటితరం పిల్లలు ఈ సీరియల్ చూస్తేమాత్రం మహాభారతాన్ని, అందులోని పాత్రలను తప్పుగా అర్ధం చేసుకునే అవకాశముంది. రామాయణం, మహాభారతం ఇతిహాసాలు మన రుషులు ఈ ప్రపంచానికి ఇచ్చిన అద్భుతమైన వరాలు. మానవ ధర్మం, మనుషుల స్వభావాలు, మనుషులు అనుసరించవలసిన ఉత్తమ ప్రమాణాలగురించి మతంతో సంబంధంలేకుండా మానవాళి సమస్తం ఈ ఇతిహాసాలద్వారా  ఎంతో నేర్చుకోవచ్చు. అటువంటి కథలను మెలోడ్రామాకోసం చౌకబారుగా చిత్రీకరించటం విచారకరం. మాటీవీవారు ఈ మహత్తర ధారావాహికరాజాన్ని త్వరలో డబ్ చేసి తెలుగువారికి అందించి తరింపజేయబోతున్నారని సమాచారం.


image courtesy:starplus.in

Monday, April 7, 2014

వీరనారి విజయశాంతి, ఫైర్‌బ్రాండ్ రేణుకలకు భంగపాటు


మెదక్‌సీటు నాదే ఎన్నోరోజులనుంచీ ధీమాగా చెప్పుకుంటూ వచ్చిన రాములమ్మకు కాంగ్రెస్ ఝలక్ ఇచ్చింది. ఆమెను మెదక్ అసెంబ్లీసీటుకు పరిమితం చేసింది. మెదక్ పార్లమెంట్ సీటును నిన్నటిదాకా జగన్ పార్టీలో చురుకుగా పనిచేసిన డాక్టర్ శ్రవణ్‌కుమార్‌రెడ్డి అనే అపరిచితుడికి ఇచ్చింది. మెదక్‌నుంచి తానుగానీ, కుమార్తె కవితగానీ, రమణాచారిగానీ నిలబడాలని యోచిస్తున్న కేసీఆర్, ఢిల్లీ లెవెల్‌లో పావులు కదిపి శ్రవణ్‌కుమార్‌రెడ్డికి ఈ టికెట్ కేటాయించేలా చేసినట్లు సమాచారం.

అసలు విజయశాంతి టీఆర్ఎస్‌నుంచి బయటకు రావటానికి కారణమే మెదక్ పార్లమెంట్ సీటు. 2009లో తమ పార్టీలోకొచ్చిన విజయశాంతికోసం - కేసీఆర్ సురక్షితమైన మెదక్ సీటును త్యాగం చేసి మహబూబ్‌నగర్‌కు వెళ్ళారు. అక్కడ చాలా తక్కువ మెజారిటీతో బయటపడ్డారు. ఈ సారిమాత్రం విజయశాంతికి మెదక్‌ను ఇవ్వగూడదని ఆయన ఎప్పుడో నిర్ణయించుకున్నారు. ఇది మెల్లమెల్లగా రాములమ్మకుకూడా అర్ధమైంది. దాంతో వారిద్దరిమధ్యా సంబంధాలు చెడి పార్టీనుంచి ఆమె నిష్క్రమణకు కారణమయింది. కాంగ్రెస్‌లో చేరిన తర్వాతకూడా తనకు మెదక్ సీటు కేటాయిస్తానని సోనియా హామీ ఇచ్చినట్లు రాములమ్మ అందరికీ చెప్పుకున్నారు. చివరికి చూస్తే మెదక్ సీటే ఇచ్చారుగానీ, అసెంబ్లీతో సరిపుచ్చారు. ఖంగుతిన్న రాములమ్మ, బయటకుమాత్రం అధిష్టానం తనను మెదక్ పార్లమెంట్‌గానీ, అసెంబ్లీగానీ కోరుకోమందని, తానే అసెంబ్లీ కోరుకున్నానంటూ కవరింగ్ చేసుకుంటున్నారు.

ఇక ఖమ్మం ఫైర్ బ్రాండ్ రేణుకా చౌదరి పరిస్థితి మరీ దారుణం. విజయశాంతికి అసెంబ్లీ టికెట్ అయినా ఇచ్చారు. రేణుకను అధిష్టానం పట్టించుకున్న పాపాన పోలేదు. గత మూడు పర్యాయాలుగా ఇక్కడ పోటీచేసి రెండుసార్లు(1999,2004) విజయం సాధించిన రేణుకకు కనీసం మాటమాత్రమైనా చెప్పకుండానే సీపీఐ నారాయణకు ఈ స్థానాన్ని కేటాయించారు. వాస్తవానికి అధిష్టానందగ్గర రేణుక పరపతి పడిపోయి చాలా రోజులే అయింది. గత నవంబర్‌లోనే ఆమెను అధికార ప్రతినిధి పదవినుంచి ఆమెను తప్పించారు. రాహుల్ గాంధి స్వయంగా చెప్పిమరీ ఆమెను తప్పించారని సమాచారం. ఖమ్మంజిల్లానేతలు పొంగులేటి సుధాకర్‌రెడ్డి, రాంరెడ్డి వెంకటరెడ్డి రేణుకపై ఇచ్చిన నివేదికలుకూడా దీనికి కారణమై ఉండొచ్చు. ఆమె మాత్రం తన తల్లి ఆరోగ్యం బాగుండకపోవటంతో తానే తప్పుకున్నానని మీడియాకు బిల్డప్ ఇచ్చారు.

విజయశాంతిలాగే తెలంగాణ ఆడబిడ్డనని చెబుతూ వచ్చే రేణుక అసలు పుట్టింది విశాఖపట్నంలో. ఖమ్మంనుంచి గెలిచినా ఎక్కువగా ఢిల్లీలో పేజ్ 3 జీవితాన్ని గడిపుతూ ఉంటారు. ఏనాడూ తెలంగాణ ఉద్యమంలో పాల్గొనని రేణుక ఈ మధ్యమాత్రం భద్రాచలాన్ని సీమాంధ్రకు ఇవ్వాలంటే తన శవంమీదుగానే ‌వెళ్ళాలంటూ హడావుడి చేశారు. ఉత్తరాంధ్ర జిల్లాలను తెలంగాణలో కలపాలంటూ అర్ధం పర్ధంలేని స్టేట్‌మెంట్లుకూడా ఇచ్చారు. చివరికి నిన్న అధిష్టానం మొండి చెయ్యిచ్చేటప్పటికి, మహిళలు, సమానత్వం అంటూ వాదన మొదలు పెట్టారు. అధిష్టానం విడుదల చేసిన జాబితాలో ఒక్క మహిళకూడా లేదని, దీనిపై హైకమాండ్‌ను నిలదీస్తానని చెబుతున్నారు.

కొసమెరుపు: విజయశాంతిని గత ఆగస్టునెలలో సోనియాగాంధివద్దకు తీసుకెళ్ళి పరిచయం చేసింది రేణుకా చౌదరే కాగా వీరిద్దరికీ ఈ ఎన్నికల్లో కాంగ్రెస్ అధినేత్రి  నుంచి ఒకేరకమైన అనుభవం ఎదురవటం విశేషం.


images courtesy:facebook/pages/vijayashanti & sarkariinfo.com

Saturday, April 5, 2014

చెవుల్లో అమృతం పోస్తున్నట్లనిపించే లక్కీ అలీ పాట




అద్భుతమైన మెలోడీతో సాగిపోయే ఈపాట, లక్కీ అలీ రూపొందించిన 'గోరీ తేరీ ఆంఖే...' అనే ప్రైవేట్ ఆల్బమ్‌లోనిది.  2001లో ఈ ఆల్బమ్‌ విడుదలయింది. దీనిలో ఎనిమిది పాటలున్నప్పటికీ పై పాటే హైలైట్. వియోగంమీద ఉన్న పాటలలో దీనికి మొదటి వరుసలో స్థానం కల్పించొచ్చు. లక్కీ అలీ గాత్రం చెవులలో అమృతం పోస్తున్నట్లుంటుంది. మంచి సంగీతంతోబాటు దృశ్యపరంగా కూడా బాగానే విజువలైజ్ చేశారని చెప్పొచ్చు. 

అలనాటి బాలీవుడ్ హాస్యనటుడు మహమూద్ కుమారుడైన లక్కీ అలీ ఆ వారసత్వంతో సంబంధం లేకుండా స్వతహాగా మంచి ప్రతిభ ఉన్న కళాకారుడు. అయినా ఎందుకో రావల్సినంత గుర్తింపు రాలేదనిపిస్తుంది. నటనలోకూడా ప్రవేశముంది. త్రికాల్, కాంటే, సుర్, కసక్‌వంటి కొన్ని బాలీవుడ్ చిత్రాలలో నటించారు. మూడు వేర్వేరు దేశాలకు చెందిన ముగ్గురు అమ్మాయిలను పెళ్ళి చేసుకున్న లక్కీకి ఐదుగురు పిల్లలు. మరో విశేషమేమిటంటే అలనాటి ప్రసిద్ధ కథానాయిక మీనాకుమారి, లక్కీ అలీ తల్లి మహేలక సొంత అక్కా చెల్లెళ్ళు.

ఈ పాట సాహిత్యం కావాలంటే ఈ లింక్‌కు వెళ్ళండి - http://lucky-ali-songs.blogspot.in/

Friday, April 4, 2014

చంద్రబాబుకు ఒకకంట పన్నీరు, ఒకకంట కన్నీరు



రెండుకళ్ళ సిద్ధాంతకర్త, తెలుగుదేశం అధినేత చంద్రబాబునాయుడు పరిస్థితి ఒక కంట పన్నీరు, ఒక కంట కన్నీరు అన్నట్లుంది. సీమాంధ్రలోనేమో కాంగ్రెస్‌నుంచి వస్తున్ననేతలతో పార్టీ కార్యాలయానికి హౌస్‌ఫుల్ బోర్డ్ పెట్టుకోవాల్సిన పరిస్థితి ఉండగా, అటు తెలంగాణలో పార్టీ దాదాపుగా ఖాళీ అయిన పరిస్థితి.

సీమాంధ్రలో తెలుగుదేశం కార్యాలయాలు కిటకిటలాడిపోతున్నాయి. దశాబ్దాలుగా కాంగ్రెస్ పార్టీలో ఉంటూ, ఎన్నో పదవులు నిర్వహించిన జేసీ దివాకరరెడ్డి, డీఎల్ రవీంద్రారెడ్డి, రాయపాటి సాంబశివరావు, మండలి బుద్ధప్రసాద్‌వంటి సీనియర్ నాయకుల దగ్గరనుంచి నిన్నటివరకు కాంగ్రెస్ ప్రభుత్వంలో సీనియర్ మంత్రులుగా పనిచేసిన గంటా శ్రీనివాసరావు, ఏరాసు ప్రతాపరెడ్డి, టీజీ వెంకటేష్, గల్లా అరుణ, పితాని సత్యనారాయణ ప్రభృతులవరకు పలువురు కాంగ్రెస్ అగ్రనాయకులు పసుపు తీర్ధం పుచ్చుకుంటున్నారు. ఇక ఎమ్మెల్యేలు, ఎమ్మెల్సీలు, ఛోటా, మోటా నాయకులకైతే కొదవేలేదు. సీమాంధ్రలో కాంగ్రెస్‌ను ఖాళీచేయించి చావుదెబ్బ కొట్టాలనే లక్ష్యంతో ఆ పార్టీనుంచి వస్తున్నవాళ్ళను  వస్తున్నట్లు అక్కున చేర్చుకుని పార్టీ కండువా కప్పుతున్నారు చంద్రబాబు.

ఇక తెలంగాణలో పార్టీ పరిస్థితి చూస్తే సీమాంధ్రకు పూర్తిగా రివర్స్. చంద్రబాబు రెండుకళ్ళ సిద్ధాంతానికి విసిగి కొందరు, తెలంగాణ వచ్చిన తర్వాత టీఆర్ఎస్ చేపట్టిన ఆకర్ష్ ఆపరేషన్‌కు ఆకర్షించబడి మరికొందరు...పదులసంఖ్యలో నాయకులు తెలుగుదేశానికి గుడ్‌బై చెప్పారు. తెలంగాణలో టీడీపీ కార్యాలయాలకు టులెట్‌ బోర్డులు పెట్టుకోవాల్సిందేనంటూ హరీష్‌వంటి కొందరు టీఆర్ఎస్ నాయకులు ఎద్దేవా చేశారుకూడా.  2009 ఎన్నికలదగ్గరనుంచి తీసుకుంటే చెన్నమనేని రమేష్ నుంచి మొదలుపెట్టి గంగుల కమలాకర్, నాగం జనార్దనరెడ్డి, కడియం శ్రీహరి, హరీశ్వర్ రెడ్డి, పోచారం శ్రీనివాసరెడ్డి, వేణుగోపాలాచారి, జోగు రామన్న, సత్యవతి రాథోడ్, కేఎస్ రత్నం, మహేందర్ రెడ్డి, జైపాల్ యాదవ్, నగేష్, బోడ జనార్దన్, హనుమంతు షిండే, మర్రి జనార్దన్ రెడ్డినుంచి నిన్నటి బాబూ మోహన్ వరకు సీనియర్ నాయకుల రాజీనామాల పరంపర కొనసాగుతూ ఉందిఎర్రబెల్లి దయాకరరావు, ఎల్.రమణ, మోత్కుపల్లి నరసింహులు, దేవేందర్‌గౌడ్, రావుల చంద్రశేఖర్‌రెడ్డి, రేవంత్ రెడ్డి మాత్రమే ఇప్పుడు అక్కడ మిగిలిఉన్న అగ్రనాయకులు. వీరిలోకూడా ఎర్రబెల్లి ఈ మధ్య జానారెడ్డిద్వారా కాంగ్రెస్‌లోకి దూకేందుకు బేరాసారాలాడారుగానీ, ఎందుకో మళ్ళీ టీడీపీలోనే కొనసాగుతున్నారు.

ఆ విధంగా ఒక ప్రాంతంలో మోదం, మరో ప్రాంతంలో ఖేదం చవిచూస్తున్న చంద్రబాబునాయుడికి ఇది విచిత్ర అనుభవమేనని చెప్పుకోవాలి


image courtesy: wikipedia

Thursday, April 3, 2014

కేసీఆర్ హామీల వర్షంలో తడిసి ముద్దవుతున్న తెలంగాణ



అసలే ఎన్నికల వేళ. ఏ రాజకీయపార్టీ అయినా కొత్త కొత్త హామీలను, సంక్షేమ పథకాలను ప్రకటించి ప్రజలకు అరచేతిలో వైకుంఠం చూపించటం మామూలే. మరి రాజకీయంలో ఎత్తులు, జిత్తులు అన్నిటినీ పుక్కిట పట్టిన కేసీఆర్‌వంటి నాయకుడి సంగతి చెప్పేదేముంది. ఈసారి ఎన్నికల కదనరంగంలో వాగ్దానాల ప్రకటనలో అన్నిపార్టీల నాయకులలోకీ కేసీఆరే ముందంజలో ఉన్నారని చెప్పాలి. బంగారు తెలంగాణను తయారుచేసి తెలంగాణ ప్రజలకు అందించటమే టీఆర్ఎస్ లక్ష్యమని చెబుతూ ప్రతి ఎన్నికలసభలోనూఆకర్షణీయమైన హామీలను గుప్పిస్తున్నారు. 

కాంగ్రెస్ ప్రభుత్వం ఒక్కగదితో ఇల్లు కట్టించి ఇచ్చి దానినే కైలాసం, వైకుంఠంగా భావించమంటోందని, తమ ప్రభుత్వంవస్తే పేదలకు వంటగది, స్నానాలగదితోసహా రు.3 లక్షలతో డబుల్ బెడ్‌రూమ్ ఇల్లు నిర్మించి ఇస్తామని కేసీఆర్ హామీ ఇస్తున్నారు. దళితులకు 3 ఎకరాల భూమిని ఉచితంగా అందిస్తామని వాగ్దానం చేశారు. రు.1 లక్ష లోపు ఇళ్ళ, పంట రుణాలున్నవారెవరూ వాటిని కట్టొద్దని, వాటన్నంటినీ మాఫీ చేస్తామని హామీ ఇచ్చారు. తెలంగాణరాష్ట్రంలో ఉన్న కాంట్రాక్ట్ ఉద్యోగులనందరినీ క్రమబద్ధీకరిస్తామని ప్రకటించారు(ఈ హామీపై తెలంగాణ నిరుద్యోగులు కేసీఆర్‌మీద కారాలు, మిరియాలు నూరుతున్నారు). ప్రభుత్వోద్యోగులకు కేంద్ర ప్రభుత్వోద్యోగులతో సమానంగా వేతనాలిస్తామని చెబుతున్నారు. ఆంధ్రా ఉద్యోగులు వెళ్ళిపోతే లక్షకుపైగా ఉద్యోగాలు ఖాళీ అవుతాయని, వాటిని తెలంగాణ నిరుద్యోగులతో భర్తీ చేయొచ్చని అంటున్నారు. తెలంగాణలో ఉద్యోగులను ఒకసారి జాయిన్ అయిన తర్వాత ఆ ప్రాంతంనుంచి కనీసం మూడేళ్ళవరకు బదిలీ చేయబోమని చెప్పారు. తెలంగాణ ఉద్యమంలో కీలక పాత్ర పోషించినందుకు ఉద్యోగులకు ప్రత్యేక ఇంక్రిమెంట్ ఇవ్వనున్నట్లు తెలిపారు. గిరిజనులకు, ముస్లిమ్‌లకు 12శాతం రిజర్వేషన్ అమలు చేస్తామని, వితంతువులకు, వృద్ధులకు రు.1,000, వికలాంగులకు రు. 1,500 పింఛన్లు అందిస్తామని హామీ ఇచ్చారు. తెలంగాణలో కోటి ఎకరాలకు సాగునీరు అందించే బాధ్యత తనదని, ప్రతి అసెంబ్లీ నియోజకవర్గంలో లక్ష ఎకరాలకు సాగునీరు అందిస్తామని చెప్పారు. ప్రతి మండలకేంద్రంలోనూ 30 పడకల ఆసుపత్రిని కట్టిస్తామని, ఒక్కొక్కరికి రు. లక్ష జీతంఇచ్చి నలుగురు వైద్యులను నియమిస్తామని హామీ ఇచ్చారు. నియోజకవర్గ కేంద్రంలో 100 పడకల ఆసుపత్రిని, జిల్లా కేంద్రంలో నిమ్స్ తరహాలో ఒక సూపర్ స్పెషాలిటీ ఆసుపత్రిని కడతామని హామీ ఇచ్చారు. నిజాం షుగర్స్‌ను తెలంగాణ ప్రభుత్వం స్వాధీనం చేసుకుంటుందని కేసీఆర్ అన్నారు.

ఉచిత విద్యహామీ విషయంలో కేసీఆర్ ఒక అడుగు ముందుకెళ్ళారని చెప్పక తప్పదు. చిన్నపిల్లల చదువు బాధ్యత స్థానిక పోలీసులకు అప్పగిస్తామని, ఎవరైనా పిల్లలు బడికి వెళ్ళకుండా ఉంటే స్థానిక పోలీసు అధికారిపై చర్యలు తీసుకుంటామని చెప్పారు. కేజీ నుంచి పీజీ వరకు ఉచితంగా కార్పొరేట్ విద్య అందిస్తామని, పిల్లలకు తిండి, చదువు, బట్టలు, పుస్తకాలు అన్నీ ప్రభుత్వమే భరించేలా చూస్తామని అన్నారు. ప్రతి నాలుగైదు గ్రామాలకు కలిపి ఒక రెసిడెన్షియల్ పాఠశాలను ఏర్పాటు చేస్తామని చెప్పారు. తెలంగాణలో అందరికీ ఒకే పాఠశాల, ఒకే విద్య, ఒకే భోజనం, ఒకే యూనిఫామ్ ఉంటుందని అన్నారు.

విద్యుత్ విషయంలోనూ కేసీఆర్ భారీ హామీలే గుప్పించారు. తెలంగాణ రాష్ట్రం వస్తే ఎలాంటి అంతరాయం లేకుండా నిరంతర విద్యుత్ సౌకర్యాన్ని కల్పిస్తామని చెప్పారు. తెలంగాణ అంతా విద్యుత్ వెలుగులతో దేదీప్యమానమవుతుందని అన్నారు. కొత్త ప్రభుత్వంలో అవినీతికి తావుండదని, అవినీతి అంతం తన పంతం అని కేసీఆర్ చెప్పారు.

కొసమెరుపు: తెలంగాణ వస్తే దళితుడిని ముఖ్యమంత్రిని, ముస్లిమ్‌ను ఉపముఖ్యమంత్రిని చేస్తానని గతంలో చెప్పి ఇప్పుడు మాట మార్చటాన్నే కేసీఆర్‌పై ప్రధాన ప్రచారాస్త్రంగా ప్రత్యర్ధులు వాడుకుంటున్న ప్రస్తుత తరుణంలో...ఆయన గుప్పిస్తున్న పై హామీలను తెలంగాణ ప్రజలు నమ్ముతారో, లేదో తెలియాలంటే ఫలితాలవరకు వేచి చూడాల్సిందే!


image courtesy: wikipedia

Tuesday, April 1, 2014

మయసభలోలాంటి మెట్ల మాయాజాలం వీడియో చూడండి!




గమనిక: మొదటి 40 సెకన్లవరకు విశేషమేమీ కనిపించదు...ఓపిక పట్టి చూడండి.

గుడివాడలో దొంగనోట్లు పంచింది తెలుగుదేశమంటూ సాక్షి కథనం



గత ఆదివారం గుడివాడలో మున్సిపల్ ఎన్నికలసందర్భంగా ఒకవార్డులో జగన్ పార్టీ నేతలు ఓటర్లకు దొంగనోట్లు పంచారని మీడియా అంతా కోడైకూసిన సంగతి తెలిసిందే. టైమ్స్ ఆఫ్ ఇండియావంటి ఆంగ్ల దినపత్రికలుకూడా వైఎస్ఆర్ సీపీనేతలు ఈ వ్యవహారంలో నిందితులుగా ఉన్నట్లు (http://goo.gl/UqFBNR) వార్తను ఇచ్చాయి. అయితే, సాక్షి మీడియామాత్రం ఈ వార్తను దీనిని 'తనదైన శైలి'లో ఆవిష్కరించింది. గుడివాడలో తెలుగుదేశంనేతలు చెల్లనినోట్లు పంపిణీ చేశారంటూ ప్రింట్, ఎలక్ట్రానిక్ మీడియాలలో కథనాలు ఇచ్చింది. క్రింది లింక్‌లో ఆ కథనాలను చూడొచ్చు.

http://goo.gl/ogIJM3

ఈ వార్త పూర్వాపరాలలోకి వెళ్తే, గుడివాడ పట్టణంలోని 21వవార్డులో అభ్యర్ధి ఒకరు ఓటుకు రెండువేలరూపాయల చొప్పున డబ్బు పంచారు. నాలుగు ఐదొందలరూపాయల నోట్లుగా ఆ డబ్బును ఇచ్చారు. తీసుకున్న ఓటర్లలో కొందరు వాటిని దుకాణాలలో ఇవ్వబోగా అవి 2005కు పూర్వం ముద్రించినవి కాబట్టి చెల్లబోవంటూ వ్యాపారులు నిరాకరించారు. దీంతో, తాము మోసపోయామని భావించిన సదరు ఓటర్లు లబోదిబోమన్నారు. అయితే తాము తీసుకుంది అక్రమ వ్యవహారంకాబట్టి పోలీసులకు చెప్పలేక తేలుకుట్టిన దొంగల్లాగా కిమ్మనకుండా కూర్చున్నారు. అయితే  మీడియాకు ఎలాగో పొక్కి ఈ విషయం బయటకొచ్చింది. స్థానిక తెలుగుదేశంనేతలు ఈ వ్యవహారంపై వైఎస్ఆర్ సీపీ నేతలమీద పోలీసులకు ఫిర్యాదుచేశారు. ఇద్దరు జగన్ పార్టీ నేతలను అదుపులోకి తీసుకుని విచారిస్తున్నట్లు పోలీసులు తెలిపారు. మరోవైపు, తాము పంచింది నకిలీ నోట్లుకాదని, 2005కుపూర్వం ముద్రించినవిమాత్రమేనని సదరు అభ్యర్ధితరపువారు ఓటర్లకు నచ్చచెబుతున్నా ఉపయోగంలేకుండా పోయింది. విషయం పోలీసులదృష్టిలోకెళ్ళిపోయింది. పోలీసులు పంపిణీ జరిగిన నోట్లను సేకరించి విచారణ ప్రారంభించారు.

image courtesy:wikipedia.com

Sunday, March 30, 2014

"సీమాంధ్రలో జగన్, తెలంగాణలో తెరాస విజయఢంకా"

త్వరలో జరగబోయే అసెంబ్లీ, పార్లమెంట్ ఎన్నికల్లో సీమాంధ్రలో జగన్ పార్టీ, తెలంగాణలో తెరాస మెజారిటీ సాధిస్తాయని తాము నిర్వహించిన సర్వేలో తేలినట్లు  నీల్సన్-ఎన్‌టీవీ సంస్థలు వెల్లడించాయి. ఇవాళ వెలువడిన ఈ సర్వేఫలితాల ప్రకారం, సీమాంధ్రలో అసెంబ్లీ ఎన్నికల్లో జగన్ పార్టీకి 129-133, తెలుగుదేశానికి 42-46, కాంగ్రెస్‌కు 0 స్థానాలు, పార్లమెంట్ ఎన్నికల్లో జగన్ పార్టీకి 19-21స్థానాలు, తెలుగుదేశానికి 4-6, కాంగ్రెస్‌కు 0 స్థానాలు లభిస్తాయి. ఇక తెలంగాణలో అసెంబ్లీ ఎన్నికల్లో తెరాసకు 51-57, కాంగ్రెస్‌కు 46-52, బీజేపీకి 5-8, తెలుగుదేశానికి 4-6,ఎమ్ఐఎమ్‌కు 7-8, పార్లమెంట్ ఎన్నికల్లో తెరాసకు 6-8, కాంగ్రెస్‌కు 7-9 సీట్లు దక్కనున్నాయని సర్వే చెబుతోంది.

అయితే, అభ్యర్ధుల ఎంపిక, పొత్తుల ఖరారు తర్వాత ఈసర్వే ఫలితాలలో స్వల్ప తేడాలుంటాయని, మళ్ళీ తాము కొద్దిరోజులలో మరో సర్వే జరపబోతున్నామని, అప్పుడు మరింత ఖచ్చితత్వం వస్తుందని నీల్సన్ సంస్థ ప్రతినిధి శేషగిరిరావు చెప్పారు. సీమాంధ్రలో జగన్ పార్టీ ప్రభావం నిలకడగా ఉంటుండగా, తెలుగుదేశం పుంజుకుంటోందని తెలిపారు. ప్రస్తుతం ఈ రెండుపార్టీలమధ్య ఓట్లశాతం తేడా ఎనిమిదేనని, పట్టణ ప్రాంత ఓటర్లు టీడీపీవైపు మొగ్గుచూపుతున్నారని వెల్లడించారు. 

జగన్ పార్టీ పోల్ మేనేజ్‌మెంట్, అభ్యర్ధుల ఎంపిక విషయాలలో బాగా బలహీనంగా ఉందికాబట్టి అది తెలుగుదేశానికి కలిసిరావచ్చని సర్వేఫలితాలపై ఎన్‌టీవీలో జరిగిన చర్చాకార్యక్రమంలో పాల్గొన్న బీజేపీ సీమాంధ్రశాఖ ముఖ్యనాయకుడు రఘునాధబాబు అన్నారు. మరోవైపు సీమాంధ్రలో అసెంబ్లీ, మున్సిపాలిటీ ఎన్నికల్లో తెలుగుదేశానికి మెజారిటీ రాకుంటే రాజకీయ సన్యాసం తీసుకుంటానని ఆపార్టీకి చెందిన రాజ్యసభ సభ్యుడు సి.ఎం.రమేష్ ప్రకటించారు. ఎన్‌టీవీలో జరిగిన చర్చాకార్యక్రమంలో రమేష్ ఈ ప్రకటన చేశారు. ఈ సర్వేను నమ్ముతున్నామని జగన్ పార్టీ నేత మైసూరారెడ్డి, తెరాస నేత కేటీఆర్ చెప్పారు. 

image courtesy:ntvtelugu.com

Saturday, March 29, 2014

'యోగాతో ఆక్రోబాటిక్ విన్యాసం' - అద్భుతమైన వీడియో

పవన్ విశాఖ ప్రసంగంలో ఒక చెప్పుకోదగ్గ పాయింట్


జనసేన పార్టీ, దాని సిద్ధాంతాలు, పవన్ 'ఇజం'పైన ఎన్ని భిన్నాభిప్రాయాలు వ్యక్తమవుతున్నా, విశాఖపట్నం ప్రసంగంలో కళ్యాణ్ లేవనెత్తిన ఒక పాయింట్‌‌ మాత్రం అధికశాతంమందినుంచి ప్రశంసలు అందుకుంటోంది.. అదేమిటంటే, రానున్న లోక్‌సభ ఎన్నికలకుగానూ అభ్యర్ధులను ఎంపికచేయటానికి కాంగ్రెస్ పెద్దలు వార్ రూమ్‌లో ఏకబిగిన 12గంటలపాటు చర్చలు జరిపినట్లు నిన్న దినపత్రికలలో వచ్చిన వార్తగురించి. సొంతపార్టీ అభ్యర్ధుల ఎంపికపై ఇంత సుదీర్ఘ కసరత్తు చేసే కాంగ్రెస్ పార్టీ - దేశంలోని అతిపెద్దరాష్ట్రాలలో ఒకటైన ఆంధ్రప్రదేశ్‌ను విభజించటంపై అదే వార్ రూమ్‌లో 40నిమిషాలలో నిర్ణయం తీసుకుందని పవన్ కళ్యాణ్ మండిపడ్డారు. రాష్ట్రప్రజల మనోభావాలంటే కాంగ్రెస్ పార్టీకి అంత చులకనగా ఉందా అంటూ నిప్పులు చెరిగారు.

ఈ పాయింట్‌ను మాత్రం అందరూ ఒప్పుకుని తీరాలి. పదేళ్ళుగా అధికారంలో ఉన్న కాంగ్రెస్, ఎన్నికలు రాబోతున్నాయనగా, ఆఖరినిమిషంలో విభజనకు అంగీకరించటం తెలంగాణ ప్రజల మనోభావాలను గుర్తించికాదని, ఓట్లకోసమేనని అందరికీ తెలిసిన విషయమే. ఆ మాటకొస్తే, కాంగ్రెస్ పార్టీ హడావుడిగా ప్రవేశపెట్టిన ఈ విభజనబిల్లువలన తెలంగాణ రాష్ట్రం ఏర్పడిందన్నమాటేగానీ, తెలంగాణ ప్రజల ప్రయోజనాలు పూర్తిగా నెరవేరటంలేదని, పలు నష్టాలున్నాయని కేసీఆర్‌తోసహా పలువురు తెలంగాణవాదులు చెబుతున్నసంగతి తెలిసిందే(తెలంగాణ ఉద్యమానికి ఇది ఇంటర్వెల్ - కేసీఆర్).

అటు సీమాంధ్ర ప్రయోజనాలకు సంబంధించికూడా, ఆ ప్రాంత కేంద్రమంత్రులు ప్రతిపాదించిన పలు సవరణలు పెట్టకుండానే కాంగ్రెస్ పార్టీ హడావుడిగా ఉభయసభలలో దానిని ఆమోదింపజేసింది. పైగా ఇంత ముఖ్యమైన బిల్లు లోక్‌సభలో ప్రవేశపెట్టేసమయంలో ప్రధానమంత్రి మన్మోహన్‌సింగ్‌గానీ, యూపీఏ ఛైర్ పర్సన్ సోనియాగాంధీగానీ సభలో లేకపోవటం గమనార్హం.

అందుకే, పవన్ ప్రసంగంలో కాంగ్రెస్‌పై చేసిన విమర్శలలో ఇదిమాత్రం అతని సినిమాలలో సూపర్‌హిట్ డైలాగులాగా బాగా పేలిందని చెప్పాలి.

Thursday, March 27, 2014

మరో వివాదంలో మోహన్‌బాబు:గౌరవ డాక్టరేట్ నకిలీదేనని నిర్ధారణ




డైలాగ్‌కింగ్ మోహన్‌బాబును మరో వివాదం చుట్టుముట్టింది. అయినా వివాదాలు ఆయనకు కొత్తకాదనుకోండి. ఈ సారి వివాదం ఆయనకు కొన్నేళ్ళక్రితం లభించిన గౌరవ డాక్టరేట్ పట్టాపై. అమెరికాలోని ఇంటర్నేషనల్ క్యాలిఫోర్నియా యూనివర్సిటీ మోహన్‌బాబుకు డాక్టరేట్ పట్టాఇచ్చి గౌరవించింది. అప్పటివరకు ఎన్టీఆర్, ఏఎన్‌ఆర్ వంటి గొప్పనటులకు ఆంధ్రా యూనివర్సిటీయో, నాగార్జున యూనివర్సిటీ డాక్టరేట్‌లు ఇవ్వటంమాత్రమే చూసిన తెలుగువారికి మోహన్‌బాబు నేరుగా అమెరికానుంచే డాక్టరేట్ పట్టా పొందటం ఆశ్చర్యకరంగానూ, అపూర్వంగానూ అనిపించింది. ఈ అరుదైన ఘనత సాధించినందుకు ఆయనకు చెన్నైలో నాడు భారీఎత్తున సన్మానంకూడా జరిగింది.

సదరు అమెరికా యూనివర్సిటీ ఒక పెద్ద ఫ్రాడ్ అని ఇప్పుడు తేలింది. ఈ సంస్థ మోహన్‌బాబుకేకాక మాజీ ఎంపీ రాజగోపాల్ నాయుడు(మాజీ మంత్రి గల్లా అరుణతండ్రి), మిసిమి పత్రిక ఎడిటర్ ఆలపాటి రవీంద్రనాథ్ వంటి మరికొందరు తెలుగువారికికూడా ఈ గౌరవ డాక్టరేట్‌లు ఇచ్చిందట. ఈ యూనివర్సిటీ వ్యవహారం తేడాగా ఉన్నట్లు గమనించిన నరిశెట్టి ఇన్నయ్యగారనే సీనియర్ తెలుగు జర్నలిస్ట్ అమెరికా వెళ్ళినపుడు దీనిపై పరిశోధన చేయగా ఆశ్చర్యకరమైన వాస్తవాలు వెలుగులోకి వచ్చాయి. ఇక్కడ ఇన్నయ్యగారిని గురించి చెప్పుకోవాలి. ఈయన డెబ్భై, ఎనభై దశకాలలో తెలుగు మీడియాలో పేరుగాంచిన పాత్రికేయులు, హేతువాది, మానవతావాది. కోట్ల విజయభాస్కరరెడ్డి, మర్రిచెన్నారెడ్డి, భవనం వెంకట్రామరెడ్డి, వైఎస్ వంటి ముఖ్యమంత్రిస్థాయి నాయకులతో నేరుగా మాట్లాడేటంత చనువు, సాన్నిహిత్యం వీరికి ఉండేది. అమెరికానుంచి వెలువడే ప్రముఖ దినపత్రిక 'వాల్‌స్ట్రీట్ జర్నల్' ఎడిటర్‌ రాజు నరిశెట్టి వీరి కుమారుడే.

ఇంటర్నేషనల్ క్యాలిఫోర్నియా యూనివర్సిటీ ఇచ్చే గౌరవ డాక్టరేట్‌లపై సంతకాలు చేసే రాయ్ బి అలివర్ అనే వ్యక్తికోసం ఇన్నయ్య ఆరా తీయగా అతను క్యాలిఫోర్నియా రాష్ట్రంలోని శాన్‌ఫ్రాన్సిస్కోలో లాస్ ఆల్టోస్ అనే చోట ఉన్నట్లు తెలిసింది. ఇన్నయ్య నేరుగా ఆయన ఉన్నచోటికి వెళ్ళి కలిసి యూనివర్సిటీ ఎక్కడ అని అడగగా, వాషింగ్టన్ నగరంలో ఒక చిరునామాను ఇచ్చరట. తమ యూనివర్సిటీపై ఇండియాలోని హిందూ దినపత్రిక నిరాధారమైన ఆరోపణలు చేస్తోందని, ఆ పత్రికపై దావా వేయబోతున్నానని కూడా చెప్పాడట. ఇక ఇన్నయ్య అలివర్ ఇచ్చిన వాషింగ్టన్ చిరునామాకు వెళ్ళగా అది తాళంవేసిఉన్న ఒక అపార్ట్‌మెంట్ అడ్రస్‌గా తేలింది.

చెన్నైలోని మైలాపూర్‌లో ఉన్న త్యాగరాజన్ అనే ఏజెంట్ ద్వారా అలివర్ డాక్టరేట్ డిగ్రీల బేరాలు మాట్లాడుకుంటాడని ఇన్నయ్యగారి పరిశోధనలలో బయటపడింది. ఇదీ మన లెజెండ్ మోహన్‌బాబుగారి డాక్టరేట్ ప్రహసనం. పద్మశ్రీ పురస్కారం దుర్వినియోగంపై ఇప్పటికే హైకోర్టులో ఆయనపై కేసునడుస్తున్న సంగతి తెలిసిందే. దానికితోడు ఈ నకిలీ డాక్టరేట్ విషయం కూడా హైకోర్టువారికి తెలిస్తే పెదరాయుడు పరిస్థితి ఏమిటో?


గమనిక: 'ది హన్స్ ఇండియా' ఆంగ్లదినపత్రికలో ఇన్నయ్యగారు ఈ విషయంపై రాసిన వ్యాసాన్ని పై భాగాన చూడొచ్చు. దాని లింక్ - http://goo.gl/PdgcS7

రాయల్ 'బుల్లెట్'పై పెరిగిపోతున్న మోజు: ఎందుకింత క్రేజ్!

తెలుగు సినిమాల్లో, ఆ మాటకొస్తే మనదేశంలో రూపొందే ఏ కమర్షియల్ సినిమాలోనైనా క్లైమాక్స్ సీనులో - బాధితులను ఆదుకోవటానికి, విలన్ బ్యాచిని చి...