Tuesday, February 10, 2015

ఢిల్లీలో అద్భుతాన్ని ఆవిష్కరించిన సామాన్య మానవుడు!


ఎనిమిది నెలలక్రితం తిరుగులేని మెజారిటీతో అధికారం చేజిక్కించుకున్న 'మోడి-షా అండ్ కో'కు ఢిల్లీ ఆమ్ ఆద్మీలు(సామాన్య మానవులు) దిమ్మతిరిగిపోయే షాక్ ఇచ్చారు. ప్రభుత్వంలో, పార్టీలో ఏకపక్షంగా - కేంద్రీకృతంగా వ్యవహారాలు నడుపుతున్న మోడి-షా ద్వయానికి ఇది చెంపపెట్టు. అమిత్ షా ఎంతో ప్రతిష్ఠాత్మకంగా తీసుకుని ఈ ఎన్నికలలో తన శక్తియుక్తులన్నింటినీ ప్రయోగించినా ఉపయోగం లేకుండా పోయింది. తమపార్టీ ఎంపీలు 300మందినికూడా అమిత్ షా ఢిల్లీ ఎన్నికల ప్రచారంలో దించారు. ఢిల్లీ నగరంలో గణనీయసంఖ్యలో ఉన్న ఆంధ్రప్రాంత తెలుగువారిని ఆకట్టుకోవటంకోసం ఎన్నికలకు ముందు ఆంధ్రప్రదేశ్‌కు స్పెషల్ ప్యాకేజ్ ప్రకటించారు. ఆఖరు నిమిషంలో కిరణ్‌బేడిని పార్టీలోకి తీసుకుని ముఖ్యమంత్రి అభ్యర్థిగా ప్రకటించారు(దీంతో అంతర్గత విభేదాలు మొదలై ఇదే చివరికి 'బూమరాంగ్' అయింది). స్వయంగా నరేంద్ర మోడి విస్తృతంగా ప్రచారసభలలో పాల్గొని ప్రజలకు అనేక వాగ్దానాలు చేశారు. ఆమ్ ఆద్మీ పార్టీపై తీవ్ర ఆరోపణలు చేశారు.

మరోవైపు ఆమ్ ఆద్మీ పార్టీ గతంలో చేసిన తప్పులను తెలుసుకుని దాదాపు సంవత్సరకాలంగా పక్కా ప్రణాళికతో పనిచేస్తూ లక్ష్యాన్ని సాధించింది. పార్టీ వ్యవస్థను పోలింగ్ బూత్‌స్థాయినుంచి పునర్నిర్మించుకుంది. కేంద్రంలోని కాంగ్రెస్, బీజేపీ ప్రభుత్వాలు ఢిల్లీలో ఎన్నికలు నిర్వహించటంపై చేసిన జాప్యం ఆమ్ ఆద్మీపార్టీకి కలిసొచ్చింది. బీజేపీ, కాంగ్రెస్‌ పార్టీలు ఈ ఎన్నికలకు సిద్ధమైలేకపోగా ఆమ్ ఆద్మీమాత్రం వ్యూహాత్మకంగా అడుగులు వేసింది. దానికితోడు గతంలో తాను తప్పు చేశానని కేజ్రీవాల్ నిజాయతీగా క్షమాపణ వేడుకుని ప్రజలలో తనపైఉన్న అసంతృప్తిని తొలగించుకున్నారు. తనమీద ఉన్న అరాచకముద్రను తొలగిపోయేలా పాత ధోరణిని మార్చుకున్నారు. కిరణ్‌బేడివంటి ప్రత్యర్థులు రెచ్చగొట్టినా వ్యక్తిగత విమర్శలు చేయలేదు. మఫ్లర్, గళ్ళచొక్కా, కళ్ళజోడువంటి సామాన్యమానవుడి గెటప్‌తో ప్రజల హృదయాలలో స్థానం సంపాదించుకున్నారు(మోడి రు.10 లక్షల సూట్ ధరించటం పలు విమర్శలకు దారితీసింది). బుఖారి మద్దతు ప్రకటించినా దానిని తిరస్కరించటం కేజ్రీవాల్ తీసుకున్న మరో మంచి నిర్ణయమని చెప్పాలి.

ఈ ఎన్నికల ఫలితంనుంచి ఇటు మోడి-షా ద్వయం, అటు కేజ్రీవాల్ బృందం నేర్చుకోవలసింది ఎంతైనా ఉంది. మోడి-షా ద్వయం తమ అహంకారాన్ని వీడి పార్టీలో, ప్రభుత్వంలో వికేంద్రీకృత, ప్రజాస్వామిక వ్యవహారశైలిని అనుసరించాలి. కేజ్రీవాల్ బృందం తమ గెలుపుకు కారణాలను గుర్తెరిగి గతంలో చేసిన తప్పులను(ఒక్కసారి జాతీయస్థాయికి ఎదిగిపోవాలని ప్రయత్నించటం, ప్రతిదానికీ రోడ్డుకెక్కటం వగైరా) పునరావృతంకాకుండా చూసుకోవాలి. 

image courtesy: wikipedia

Wednesday, February 4, 2015

'superlative' ముఖ్యమంత్రి కేసీఆర్


చిన్నప్పుడు ఇంగ్లీష్ గ్రామర్‌ చదువుకున్నవారందరికీ parts of speech లోని ఎనిమిది భాగాలలో Adjective అనేది గుర్తుండే ఉంటుంది. ఆ Adjectiveలో Superlative Adjective అనే మరో సబ్ క్యాటగిరీ ఉంటుంది. ఆ సూపర్‌లేటివ్ ఎడ్జెక్టివ్‌కు అర్థం 'సర్వోత్కృష్టమమైనది' అని. ఈ ఉపోద్ఘాతం అంతా ఎందుకయ్యా అంటే తెలంగాణ ముఖ్యమంత్రి కేసీఆర్ వివిధ సమయాలలో, సందర్భాలలో ఆయా సమస్యలకు ప్రకటిస్తున్న 'సర్వోత్కృష్ట' పరిష్కారాలగురించి చెప్పేందుకు. అదేమిటో ఏ సమస్యకుకూడా సర్వోత్తమమైనది తప్పితే దానికి తక్కువస్థాయిలో పరిష్కారం కేసీఆర్‌కు కనబడదు. 

ఏదైనా సమస్యను వివరించటం ఆలస్యం ఆయన దానికి సర్వోత్కృష్టమైన పరిష్కారం ప్రకటించిపారేస్తున్నారు. గత అసెంబ్లీ, పార్లమెంట్ ఎన్నికలలో ప్రచారం సందర్భంగా మొదలుపెట్టిన ఈ పోకడ, అధికారం చేపట్టిన ఆర్నెల్ల తర్వాతకూడా కొనసాగుతూనేఉంది. నాడు ప్రచారంలో పేదలకు డబల్ బెడ్‌రూమ్ ఫ్లాట్, మూడెకరాల పొలం, కోటి ఎకరాలకు సాగునీరు, లక్షా 25వేల ఉద్యోగాలు, ముస్లిమ్‌లకు 12శాతం రిజర్వేషన్లు వంటి వాగ్దానాలు చేశారు. వాటి ఆచరణ ఏదశలో ఉందో ఎవరికీ తెలియదు. వాగ్దానాలుమాత్రం  అధికారం చేపట్టిన తర్వాత మరింత జోరందుకున్నాయి.

తాజాగా చూస్తే...త్వరలో రానున్న కార్పొరేషన్ ఎన్నికలదృష్ట్యా హైదరాబాద్‌నగరంమీద దృష్టి కేంద్రీకరించిన దొరవారు భాగ్యనగరాన్ని అమెరికాలోని డాలస్ నగరంలాగా చేస్తానని ఇవాళ నగరంలో జరిగిన ఓ కార్యక్రమంలో చెప్పుకొచ్చారు. మొన్నటికి మొన్న నగరంలోని పేదలందరికీ టవర్స్ అనే ఆకాశహర్య్యాలను కట్టించి గృహవసతి కల్పిస్తామని హామీ ఇచ్చారు. టవర్స్ అంటే గుర్తొచ్చింది...హుస్సేన్‌సాగర్‌చుట్టూ వంద అంతస్తుల ఆకాశహర్మ్యాలు కట్టిస్తానని, వాటిలో ప్రపంచంలోనే ఎత్తయిన టవర్ కూడా ఉంటుందని ఆ మధ్య చెప్పారు. హుస్సేన్ సాగర్ శుద్ధికి రు.100 కోట్లు, వినాయక సాగర్ నిర్మాణం, హైదరాబాద్ ఉత్తరాన మరో విమానాశ్రయం...తదితర వాగ్దానాలుకూడా చేశారు. ఇటీవల యాదగిరిగుట్ట సందర్శనకు వెళ్ళిన సందర్భంగా గుట్టను తిరుపతిని తలదన్నేలా వాటికన్ స్థాయిలో ప్రపంచస్థాయి పుణ్యక్షేత్రం చేస్తానని వాక్రుచ్చారు. బ్రాహ్మణుల సభలో వారి సమస్యలను ఏకరువు పెట్టగానే 50 కోట్ల రూపాయలతో అర్చక సంక్షేమనిధి ఏర్పాటు చేస్తానని ప్రకటించారు. ధూప దీప నైవేద్యాలకోసం ఒక్కొక్క గుడికి నెలకు రు.6 వేలరూపాయలు మంజూరు చేస్తానని మరో వాగ్దానం. వరంగల్ నగరాన్ని సూరత్ స్థాయిలో టెక్స్‌టైల్ హబ్‌గా మారుస్తానని, కరీంనగర్‌ను లండన్, న్యూయార్క్ నగరాలస్థాయిలో అభివృద్ధి చేస్తానని చెప్పారు. మళయాళీల సభలో వారి భవనానికి ఎకరం స్థలం, కోటిరూపాయల నిధులు ఇస్తానని వాగ్దానం చేశారు. ఇల్లులేని మళయాళీ కుటుంబాల జాబితా ఇస్తే డబల్ బెడ్‌రూమ్ ఇళ్ళు కట్టించి ఇస్తానని హామీ ఇచ్చారు. ఇక తెలంగాణలోని ప్రతి ఇంటికీ నాలుగేళ్ళలో నల్లా ఏర్పాటు చేయిస్తానంటూ 28వేల కోట్ల రూపాయల వాటర్ గ్రిడ్ పథకాన్ని ఆర్భాటంగా ఆవిష్కరించారు. ఈ గ్రిడ్ ప్రపంచ రికార్డ్ సృష్టిస్తుందని కేసీఆర్ చెప్పారు. ఈ గ్రిడ్‌కోసం భూమి చుట్టుకొలతకు నాలుగురెట్లు పొడవైన పైప్ లైన్లు వేయబోతున్నట్లు ప్రకటించారు.

పిట్టలదొరలాగా హామీలు ఇచ్చేస్తున్నాడని ప్రతిపక్షాలు చేస్తున్న విమర్శలు ఎలా ఉన్నా, ఈ వాగ్దానాలు - ఆచరణ విషయంలో కేసీఆర్‌ పాపులారిటీకి ఇప్పటికిప్పుడు వచ్చే నష్టమేమీలేదు. ఎందుకంటే తెలంగాణ ప్రజలు ఈ ప్రభుత్వానికి హనీమూన్ వ్యవధిని కాస్త ఎక్కువగానే ఇచ్చే మైండ్‌సెట్‌లో ఉన్నారు. కొత్త రాష్ట్రం, కొత్త ప్రభుత్వంకాబట్టి కాస్త టైమ్ ఇవ్వాలని జనంలో అభిప్రాయం నెలకొని ఉంది(అందుకేనేమో సీఎన్ఎన్ ఐబీఎన్ ఛానల్ నిర్వహించిన పోల్‌లో కేసీఆర్ మోస్ట్ పాపులర్ పొలిటీషియన్‌గా ఎన్నికయ్యారు). ఇప్పటిదాకా కేసీఆర్ ప్రభుత్వం చేసినదానినిగురించి చెప్పుకోవాలంటే కనిపిస్తున్నది ఏమైనా ఉందా అంటే - అది ఒక్క సమగ్ర సర్వే మాత్రమే(ఆ సర్వేలోని డేటాను ఎలా వినియోగించుకున్నారో తెలియటంలేదుగానీ, త్వరలో మళ్ళీ మరో సర్వే చేయించబోతున్నారట). కేసీఆర్ ఇప్పటికైనా మేలుకుని 'బెస్ట్ ఇంపాజిబుల్ సొల్యూషన్‌' ప్రకటనలను గుప్పించటంకాక ఆచరణసాధ్యమయ్యే పరిష్కారాలకోసం కృషి చేస్తే బాగుంటుంది.

photo courtesy:www.telangana.gov.in

రాయల్ 'బుల్లెట్'పై పెరిగిపోతున్న మోజు: ఎందుకింత క్రేజ్!

తెలుగు సినిమాల్లో, ఆ మాటకొస్తే మనదేశంలో రూపొందే ఏ కమర్షియల్ సినిమాలోనైనా క్లైమాక్స్ సీనులో - బాధితులను ఆదుకోవటానికి, విలన్ బ్యాచిని చి...